شبكة الشدادين

شبكة الشدادين (http://www.shdadeen.com/vbq/index.php)
-   المحاورة والألغاز الشعرية (http://www.shdadeen.com/vbq/forumdisplay.php?f=35)
-   -   ألغاز و حجايا شعرية للأذكياء فقط 4 (http://www.shdadeen.com/vbq/showthread.php?t=33500)

البرينيسي 01 Nov 2008 11:46 PM

ألغاز و حجايا شعرية للأذكياء فقط 4
 

بسم الله الرحمن الرحيم




اخواني اعضاء منتديات الشدادين


أطرح لكم هذه الالغاز والحجايا الشعرية


في جزئها الرابع


وعليكم معرفة الحل الصحيح والأعضاء الشعراء


لا نقبل حلولهم ولو كانت صحيحة


الا بأبيات شعرية00







اللغزالأول:

انا بنشدك يا رجال عن رجال من رجال= ذكره الله و نبي الله و كل الناس تدريبه
رجل في حال و اّلا حال يا رجال ما له فال = ليا منه تمادى بالرجل كثرت عذاريبه






اللغزالثاني:

امقـــــــدمٍ في لغز و أخترته خفيف=عل مـــن يقرا سطوره يرمعه
واقــفٍ بالبـــــــــاب فعله يا لطيف= لا ســـــلاحٍ يا جمــاعه يرفـــــعه
و العجب يا صاحبي من هالضعيف=جمـــع الاعداء ما توانى رجّــعه






اللغزالثالث:

يا ويش عذرى تهز الرأس و ترجه=و اللي تصيبه اطلبوا له رحمة الوالي



لقد اجتهدت لتسهيل الألغاز لأن بعض الأعضاء

يشتكي من صعوبة ألغازي في الأجزاء السابقه

ولم ينحل منها الا لغزين من ستة ألغاز

وهذا قد يصيبنا بالاحباط الشديد00

أرجو أن لا يكون هذا الجزء كسابقه من الأجزاء

فكروا زين ونبغى رمعات في الصميم

ومعاكم أسبوع من تاريخه0000

دمتم بود

حاتم الشدادي 02 Nov 2008 01:51 AM

ياهلا والله بأطلالتك يالبرينيسي
ويامرحبا والله بألغازك



لي عودة
ترقبني :)

أبو راكان 03 Nov 2008 02:21 AM

اقتباس:

انا بنشدك يا رجال عن رجـال مـن رجـال=ذكره الله و نبي الله و كل النـاس تدريبـه
رجل في حال و اّلا حال يا رجال ما له فال=ليـا منـه تمـادى بالرجـل كثـرت عذاريبـه




ابرمع لغزك وربي هو الواحد بدون جدال=يظنون البشر والله متصرف في غيبة
يكون المال للي يعرفون يصرفون المال=بعكس اللي طغى همة وهمة دوم في جيبة






اقتباس:

امقـدمٍ فـي لغـز و أخترتـه خفـيـف=عـل مــن يـقـرا سـطـوره يرمـعـه
واقــفٍ بالـبـاب فعـلـه يــا لطـيـف=لا ســـلاحٍ يـــا جـمـاعـه يـرفـعــه
و العجب يا صاحبي من هالضعيف=جمـع الاعـداء مــا تـوانـى رجّـعـه




ملاحظة أخوي وزن اللغز غير مستقيم لذالك كان ردي على وزن صدر البيت الأول


قل يالبرينسي وحنا نبا نظيف=خلفك ونمشي لو على نور شمعة
القفل يارجال ماله تواصيف=خلا الحرامي منه ينهل دمعة
بسيط لكنه قوي التكاليف=على غشيمٍ ناويٍ له بطمعة





اقتباس:

يا ويش عذرى تهز الـرأس و ترجـه=و اللي تصيبه اطلبوا له رحمة الوالي



الصاقعه تظرب العالي وتدجه=ياكم سمعنا غدا للناس من غالي

أبو راكان

البرينيسي 03 Nov 2008 05:31 PM

الله يبقيك اخوي حاتم الشدادي ويطول مهاليك

وانا بانتظار عودتك

دمت بود

البرينيسي 03 Nov 2008 06:44 PM

[QUOTE=أبو راكان;496711]
ابرمع لغزك وربي هو الواحد بدون جدال=يظنون البشر والله متصرف في غيبة
يكون المال للي يعرفون يصرفون المال=بعكس اللي طغى همة وهمة دوم في جيبة

يا بوراكان ياللي ترمع اللغز ويجيه اجفال= لكن ذا المره الله سلمه ما أظن بتجيبه
ترى ما لك لوى ماهو بمال ولا طرى في البال= لكن ارمع برمعه ثانيه يمكنّها تصيبه





ملاحظة أخوي وزن اللغز غير مستقيم لذالك كان ردي على وزن صدر البيت الأول
قل يالبرينسي وحنا نبا نظيف=خلفك ونمشي لو على نور شمعة
القفل يارجال ماله تواصيف=خلا الحرامي منه ينهل دمعة
بسيط لكنه قوي التكاليف=على غشيمٍ ناويٍ له بطمعة




اخوي ابو راكان وزن الابيات مستقيم 100%
فهو على بحرالصخري (مفاعلتن مفاعلتن فعولن)
وردك انت على بحر المسحوب (مستفعلن مستفعلن فاعلاتن)

و مالك لوى ماهو القفل 00

يا مرحبا ترحيب واشرب من الكيف= من دلة الرسلان يا زين نبعه
والحل ما جانا والى الحين ما شيف=ماهو بقفل ولا يجي فيه صنعه
حاول بحل ٍ ثاني ولا ش تصريف = يمكن تكون المعرفه مِعك سنعه







الصاقعه تظرب العالي وتدجه=ياكم سمعنا غدا للناس من غالي





مالك لوى يا عميلٍِ ما لقى حجه = وشكرا على ردكم يا طيب الفالي







ودمت بود

أبو راكان 03 Nov 2008 07:43 PM

يعني كلها ذبت الريع

المشكى على الله

المعذرة أخوي الزكام بلغ مني اليوم مبلغه

لي عوده بحول الله أن لم يحلة أحد قبل عودتي

بس قلي أخوي البرينيسي قربت والله بعيد

والله يوفقك ويبارك فيك أستمر جهودك طيبه ومباركه بحوله تعالى

صح لسانك وبالتوفيق أخوي

البرينيسي 03 Nov 2008 07:55 PM

هلا بك يا بوراكان وما تشوف شر

والله ان الحال من بعضه الله يعين على الزكمه

بالنسبه لحلولك بعيده عن الحلول الصحيحه

ولكن حلحل الابيات زين وبتحصل الحل باذن الله

الله يوفقك ويبيض وجهك ودمت بود00

حاتم الشدادي 14 Nov 2008 06:26 PM

الأسبوع خلص وقضى من زمان يا البرينيسي
وماش مافيه من يحل ألغاز

لكن المرة الجاية بنتدارك الأمر
وراح نوزع رابط الموضوع على الشعار خصوصاً والأعضاء عموماً


لكن قبل لا نختم عندي أجوبة
وأن شاء الله واحد منها صح :)

الأجابة الأولى :
الكرم
الأجابة الثانية :
يد الباب أو العين السحرية
الأجابة الثالثة :
هي حدى ثنتين يا أبو مسحه وألا العطاس :) << كلها ترج الرأس :D

البرينيسي 14 Nov 2008 10:23 PM

يا هلا والله بمشرفنا المتميز والأجدر بالمسؤليه


نعم ياحاتم المده المحدده خلصت

وانا بغيت اطرح الحلول البارح

لكن قلت نصبر شوي لعل وعسى

وكل تاخيره فيها خيره

بالنسبه لحلولك طيبه ومن وجه طيب


فاللغز الاول مالك لو واظنك ما دققت في الابيات مضبوط لان اللغز يقول :




رجل في حال و اّلا حال يا رجال ما له فال =ليا منه تمادى بالرجل كثـرت عذاريبـه



فهذا الشيء اذا تمادى في الرجل تكثر عذاريبه .


وهي صفه اذا تمادت في الرجل تكون


غيرمحموده اما في حال آخر فهي طيبه.


واللغز الثاني : سوف اعطيك هذا البيت وسوف يوضح لك الحل كثيراا..



حاميٍ من كان مقصدهم شريف= ورجع اللي مقصد الشر جمّعه




اما اللغز الثالث وانا اخوك ماهوب ابو مسحه ولاهوب ابونكهه


هو العطسه بيض الله وجهك

حلك صحيح والله لايهينك يا ذيبان


رميته رمية ٍ ما اخطته وخلته صريع يسبح في دمه


الله يعطيك العافيه بس باقي اللغزين الاول والثاني

اباعطيك فرصه وانشاء الله


تجيب الحل الصحيح بعد هذا التوضيح..




ودمت بود

حاتم الشدادي 14 Nov 2008 10:51 PM

اقتباس:


يا هلا والله بمشرفنا المتميز والأجدر بالمسؤليه



نعم ياحاتم المده المحدده خلصت

وانا بغيت اطرح الحلول البارح

لكن قلت نصبر شوي لعل وعسى

وكل تاخيره فيها خيره

الله يسلمك يابعدي
وحنا بالخدمة لرضاكم

وأنا والله مخمخت عليها نص ساعة
وهذا اللي طلع معي :marsa120:


اقتباس:

بالنسبه لحلولك طيبه ومن وجه طيب


فاللغز الاول مالك لو واظنك ما دققت في الابيات مضبوط لان اللغز يقول :

رجل في حال و اّلا حال يا رجال ما له فال =ليا منه تمادى بالرجل كثـرت عذاريبـه

فهذا الشيء اذا تمادى في الرجل تكثر عذاريبه .

وهي صفه اذا تمادت في الرجل تكون

غيرمحموده اما في حال آخر فهي طيبه.


الله يسلمك ويطيب فالك

الكرم يصير بذخ وترف
وهذي صفة ماهي محمودة

طيب
وش رأيك بالشك ؟!

وأذا ماطلع صح أصبر علي
بأحله يعني بأحله :a12:

اقتباس:

واللغز الثاني : سوف اعطيك هذا البيت وسوف يوضح لك الحل كثيراا..


حاميٍ من كان مقصدهم شريف= ورجع اللي مقصد الشر جمّعه


أجل هذا
بيت العنكبوت اللي حمى النبي - صلى الله عليه وسلم -
وقل صح :)


ولي عودة لأجل أحل اللغز الأول
أنتظرني

البرينيسي 15 Nov 2008 10:26 PM

اقتباس:

المشاركة الأصلية بواسطة : حاتم الشدادي (المشاركة 502835)
الله يسلمك يابعدي
وحنا بالخدمة لرضاكم
وأنا والله مخمخت عليها نص ساعة
وهذا اللي طلع معي :marsa120:



الله يجعلك على القوة أخوي حاتم
وهذي شهادة حق تستحقها
فجهودك ملموسة في خدمة المنتديات الشعبيه
فانت المشرف الوحيد الذي يؤدي واجبه على أكمل وجه.

اقتباس:

المشاركة الأصلية بواسطة : حاتم الشدادي (المشاركة 502835)

الله يسلمك ويطيب فالك
الكرم يصير بذخ وترف
وهذي صفة ماهي محمودة
طيب
وش رأيك بالشك ؟!
وأذا ماطلع صح أصبر علي
بأحله يعني بأحله :a12:
]





أخوي حاتم
الكرم مهما زاد فهو محمود وامرطيب ولا يعذرب الرجال ابدا.

اما الاسراف فهو موضوع اخر لايدخل في الكرم .

ابالنسبه للصفه اللي يقصدها اللغز فهي في حال طيبه ومطلوبه عند قسم معين

من مخلوقات الله ومذمومه اذا زادت عن حدها عند القسم الآخر

والا سوف يصير مثل القسم الثاني اذا زادت به هذه الصفه.




يالله يا ذيبان عطنا الحل خلنا ننزل الجزء الخامس



والله انك حمستني يا حاتم بعد ما اصبت بالاحباط الشديد..




اقتباس:

المشاركة الأصلية بواسطة : حاتم الشدادي (المشاركة 502835)

أجل هذا
بيت العنكبوت اللي حمى النبي - صلى الله عليه وسلم -
وقل صح :)
ولي عودة لأجل أحل اللغز الأول
أنتظرني



صح يا ذيبان عزالله انك رميته رمية

رجال ٍ راكد وخليت راسه طشان وجبت اخبره


بيض الله وجهك والله لايهينك


فعلا الحل هو: بيت العنكبوت

اللي حمى الرسول عليه السلام


وانا في انتظارك أخوي حاتم لحل اللغز الاول


دمت بود

حاتم الشدادي 16 Nov 2008 12:10 AM

الله يسلمك ويبقيك
وهذا أقل شيء نسويه يالذيب


أنا مشكلتي ما أرمع اللغز ألا في الأخير:D
ولغزك اللي باقي ماحليته أنا

قلت لك (( الـــشــك ))
ولا قلت هي صابت وألا خابت ??

وأن كانها خايبة
أصبر علي إلين اطرحها :)

البرينيسي 16 Nov 2008 12:55 AM

لا والله ما صابت ولا لك لوى

الصفه ممدوحه وذكرها الله ورسوله

وهي مطلوبه عند نوع من البشر ولكن اذا زادت

عند النوع الثاني فتصبح عذروب وليست طيبه.

ما عاد يحتاج الها يا ذيبان

هات الحل خلنا ننزل الجزء الخامس

دمت بود

حاتم الشدادي 16 Nov 2008 12:58 AM

أخر ماعندي

وأن شاء الله أنها تصيب

وش رأيك بــ (( الــخـجـل )) ؟؟

وهات النسخة الخامسة يا البرينيسي :)

البرينيسي 16 Nov 2008 01:36 AM

كفو يا حاتم و بيض الله وجهك

تصيب كيف ما تصيب وهناك رامي!!!

نعم حل اللغز الأول هو: الحياء أو الخجل

شكرااا جزيلااا للمبدع / حاتم الشدادي

على حله جميع ألغاز االجزء الرابع 00

والى اللقاء في الجزء الخامس

غداً باذن الله تعالى00

دمتم بود

حاتم الشدادي 16 Nov 2008 05:10 PM

اقتباس:

المشاركة الأصلية بواسطة : البرينيسي (المشاركة 503658)
كفو يا حاتم و بيض الله وجهك


تصيب كيف ما تصيب وهناك رامي!!!

نعم حل اللغز الأول هو: الحياء أو الخجل


شكرااا جزيلااا للمبدع / حاتم الشدادي

على حله جميع ألغاز االجزء الرابع 00

والى اللقاء في الجزء الخامس

غداً باذن الله تعالى00


دمتم بود

كفوك الطيب يا النشمي
والعفو وأنا أخوك

ونحن بأنتظار سلسلة ألغازك الممتعة :)

لمسات 18 Nov 2008 02:26 PM


:)

ما شاء الله تباركـ الله .,

أعجبني جدا ً الموضوع و الردود ..,

دمتوا بـ خير .,

.
,
.

البرينيسي 18 Nov 2008 04:33 PM

هلااااا وغلاااااا

اختي لمسات شكراااا على مرورك الرااااائع

واتمنى حضورك ومشاركتك في حل الالغاز القادمه

دمتي بود


06:17 AM

Powered by vBulletin® developed by Tar3q.com