ظلمت نفسي وظلم الـنـفـس شيٍ كـبـيـر=يا ربّ أعـنّي على نـفــسـي وهـوّن عـلـيّ
أحـنّـهـا مـن قـلـيـل وتـبــتـلـيـني كـثـيـر=لين أخجـلـتني ذنـوبـي وأثـقـلـت كـاهليّ
أيـوب صـبري يــنـازع في نفسه الآخـيـر=وسـادات عقلي تخاصم مع رعـاع جهليّ
والظنّ يـبـني بي أمـالٍ مـداها قـصــيـر=والـواقــع يـهــدّهـا مـشكور ومـجـمليّ
شاب إنتظاري وأنا أرقب كل صبحٍ بشير=مـدري متى غـيـمـة أحـزاني تبا تنجـليّ
مـتـجـوّدٍ فـ الأمـل حـتى لـو إني كـسـيـر=أبـ آتـشـالا مـعـه لو كان مـانـي شـلـيّ
أذوّب الـلـيـل في بـوحـي شـعـورٍ مــريـر=وأسـتـعـذبه وأشـربه ويمـوت في داخليّ
وآسـايـر الـوقـت مكره مير عــيّـا يـسـيـر=أحـيان أحثّ الخـطـى وأحـيان على مهليّ
تطـيح من عـيـني أحـلامي وهي زمهـريـر=وتـذوب من لـفـحـةٍ نـيـرانـهـا تصــطـليّ
كم قلت يا نفـسي الدنيا رحـىً تسـتديـر=ولا ظـنّ به قـلب من جـور الليالي خـلـيّ
(قصر النظر) ما يـقـصّـر في يدين المصـير=(وبعد النظر) ما يـعـديـني لـمـسـتـقـبـلـيّ
أضـرب بكف الجمايل ما عرفت آسـتخـير=وما ضـاع عند الآوادم مـحـتسـبـه الـوليّ
الباطل أظلم من إحساس الحقود الحقير=والـحـق نـوره يــشّـع إبـ كـل وجـهٍ جـلـيّ
يــا ربّ عـفوك ولطفك يالـعـزيـز الـقـديـر=صـحـايـفي من تـفـاصـيل الليالي مـلـيّ
يا ربّ ضاقت بي الحيلات كيف أستنير=تـقـطّـعـت كـل سـبـلـي مـا حـدٍ لــدّ لـيّ
قبل الـعـمـر لا يجـرونه بسـلـك الـحـريـر=والحـلـم يصـبح حـقـيـقـه وأنـزل بمـنزليّ
بحـمـاك أجـرني وأعـنّي يا مـعين ومجـير=ولا تـكـلـنـي على نـفـسي وجـهـد عـمليّ

المشاركة الأصلية بواسطة : السلطان (المشاركة 1557998) الله الله يا أبو سفر على جمال القصيدة وروعة أبياتها وقمة معاتيها تسلم ويسلم غاليك ولا هنت وصح لسانك ملايين والله يجعلك على القوة اليوم ودوم

المشاركة الأصلية بواسطة : درع الخوي (المشاركة 1557999) كفو والله يعزك يا ابو سفر هذي من عيون الشعر الابداعي ولا يستغرب الابداع على مثلك وشرواك لا هنت وصح لسانك

المشاركة الأصلية بواسطة : سمو الشدادين (المشاركة 1558002) صح لسانك أخوي فهد شاعر كبير ومتميز والقصيدة ابداع كل ما تعنيه الكلمة

المشاركة الأصلية بواسطة : خيال الشدادين (المشاركة 1558020) صح لسانك شاعرنا الموقر فهد على هالقصيدة الجزلة