يالله يا خلاق الأنفس من الطين = يا باسط البيدا ورافع سمانا
يالواحد الفرد الصمد قاضي الدين = عليك عنزتنا وباسمك بدانا
يالله ثبتنا على المنهج الزين = وانك على الدين الحنيف اتهدانا
يقول ابن مهرس من الشعر بيتين = سوات صب الهيل والزعفرانا
طارن عليّ من المثايل عناوين = ولا اجيب غير النادرات السمانا
شعر ٍ يعدونه رجال ٍ موامين = ماهي محاريف الغزل والحنانا
وفي ماقفي ما اقول بكرة وبعدين = وإليا بديت أصهل صهيل الحصانا
يالزرب لا ترهب واهلك الشدادين = دونك عيال العود حصن وضمانا
دونك رجال ٍ في اللزوم امعروفين = نطاحة الهيجاء طوال اليمانا
الاد شداد ان غدا العلم علمين = وطال النهار وغطرفن الزيانا
عاداتهم يثنون روس العنيدين = بمسلبات ٍ حكمها في يدانا
حنا مواريث الرجال المسمين = اللي على نهج الشهامة ربانا
واللي جهل ينشد جبال الامرين = وسلوان اظنه في الدهر ما نسانا
ولخيلنا وسط البهاره ميادين = يوم اشهب البارود جاله غشانا
صلنا ونزحنا جموع المعادين = كله لعانا الجار يومه نخانا
هذي مواقفنا مع الربع الادنين = وإليا بدا ريع اللوازم بدانا
وترعى بنا في الخوف رثم العرانين = اللي بها المشعاب رسمه يبانا
ترعى بنا من غير عاني وتأمين = ومن حيث ما طاح الحياء له نوانا
في شف سرفات البكار المزايين = نرعى الخطر بمصقل الهندوانا
ومن دونها نروي السيوف المسانين = وياشين فال اللي طرح في نحانا
والضيف يلقى عندنا الخاطر الزين = والكيف وكسور الشحم في الصيانا
ولا ننزل ألا في الرفاعة ومرسين = عادات أهلنا من قديم الزمانا
ولجارنا مثل الحياء والبساتين = محشوم ما يلحق عليه الهوانا
دونه نحط ارواحنا والملايين = ما كنه ألا واحد ٍ من حدانا
يالزرب يا ورث الجدود القديمين = لا تستمع في فلان وألا فلانا
هذي منازلنا منول وذلحين = منزال أوايلنا ومنزال ابانا
وياعنك ما حنا على الجار مخطين = وإليا بغانا في اللوازم لقانا
لكن ثار وثوّروه الشياطين = واشوف تالي الوقت قام وشنانا
وحنا لزلات الرفاقه دموحين = وفي وجعت الادنين ما قد سعانا
إن كان يبغى الطيب زين ٍ على زين = هذاه مطلبنا وغاية منانا
وإن كانه معيي فحنا معيين = قطع الرقاب ولا مهونة لحانا

المشاركة الأصلية بواسطة : مرزوق الشدادي (المشاركة 965855) الله يبيض وجهك يافيصل ابن مهرس شاعر كفوا وفخر للشدادين والاد شداد هم هل الاوله وحماية الحد