هاضني مبداي في راس الطويله = وألعب القيفان من بالي وأغني
أترك الهزلات وأجيب الجزيله = البيوت اللي لها معنى وفني
يوم بعض الناس صيداته هزيله = أحمد الله صيداتي ينومسني
ليلة ٍ تسوى لها تسعين ليله = زادت الأفراح وزيح الهم عني
وأستوى سرد السواليف الجميله = يا جماعة هاكم الأخبار مني
يا بني مهرس مقاديم القبيله = يا رجال المدح مزبان المجني
أنتم أهل الطيب ركاب الأصيله = في السنين التاليه واللي مضني
مار أنا قبل أمس شفت العصر زيله = ماهوب زول أنسي ولا هو زول جني
أثره التاريخ وسلوم ٍ نبيله = وأشهد أن القلب للماضي يحني
وجاب لي ذيك السواليف الجليله = في الشهامة والبطولات أعجبني
والعميل اللي وفي ٍ مع عميله = والحقيقة يالنشاما هيّضني
الفعل لأهله وكل ٍ له حصيله = المطر همّال والرعّاد دني
أنشدوا زيّاد1 كسّاب النفيله = وأنشدوه حسين2 عن علم ٍ شحني
يا هلي شوفوا لنا في الوضع حيله = وفي هل الفزعات ما قط خاب ظني
أصملوا والآدمي ربه وكيله = وأشهد أن الطايله تبغا تعني
ما شكيت الكم ريالاتي قليله = ورزقي اللي ضامنه رب ٍ كفلني
مار أشوف الوقت ميلاته ثقيله = ولي حقوق وفي حقوق ٍ يجبرني
وقالها قدمي من أصحاب الفضيله = (( المراجل ما تهيا بالتمني ))