في محطات الحياة ابتديت وما انتهيت=ضحكة الأحلام تغري وأنا توّي صغير
فوق صهوة نيتة الطيب ساري ما دريت=عـن مشاوير الليالي ومحفلها الكبير
السؤال يموت واللي سألني وش لقيت؟=لا يقول شلون شيّب شعر راس الغرير
عشت في غربة وصدمات يوم إني صفيت=بين عارف وش مصيري ومجهول المصير
الخساير موجعة يوم ضحيت وعطيت=والوضع لا قلت عادي ترى جداً خطير
غابة الأيام فيها وحوش وهدم بيت =لا سلمت من الوحش ما وراك الا السرير
شفت جرح الذيب دامي ومن حالة بكيت =لا هو اللي عاش والا لقى المثوى الأخير
شفت وجه الصدق يرمي قناعه واستحيت=كنت أحسب الماء زلال وظهر مرّ الغدير
اقتربت وصار بعدي كثر ما قلت ليت =وليت ما خلت بيدّي قليل ولا كثير
جيت هاقي وابتديت استشك اليا هقيت=رحـت مثل الطايح اللي يقول انه بخير
جيت ظامي والظماء ما يجامل لا ظميت =وما لقيت الماء من الشيخ ابو قلب وضمير
من يدور عز في راس ما يملاه صيت=راح يلقى الذل لو هو من يدين الأمير
كيف أريّح شاشة الفكر لا مني غفيت=والجروح تصيح واصحى على نخوة ضرير
العقل ينسى ونفسي ترد اللي نسيت=شي أكبر من دموع الرجل حزة عصير
وين ابلقى لي دواء كل ما أقبلت وسريت =والدواء والله ما يجبر العظم الكسير
لو جروح الناس تطوى وتبرى ما بريت=الجروح أحيان تكبر مثل جرح الفقير
في محطات الحياة انتهيت وما انتهيت =ماتت أحلامي بكفّي وانا رجلٍ كبير

المشاركة الأصلية بواسطة : السلطان (المشاركة 1566458) ارحب ارحب يا شاعرنا العزيز أبو سلطان والله يحييك في منتداك بعد طول البعد وصح لسانك مدد بلا عدد وعسى عيدك سعيد وعمرك مديد

المشاركة الأصلية بواسطة : سمو الشدادين (المشاركة 1566459) صح لسانك أخوي الشاعر أحمد الشدادي وصح لسانك على هذه القصيدة الرائعة وإن شاء الله نشوف لك المزيد من القصائد ونتشرف بقراءتها والاستمتاع بها

المشاركة الأصلية بواسطة : درع الخوي (المشاركة 1566460) مرحبا ملايين وصح لسانك ولا هنت على هذه القصيدة والله يجمل حالك ما قصرت ونطالبك بالمزيد والجديد

المشاركة الأصلية بواسطة : عبدالله السلطان (المشاركة 1566463) صح لسانك أخوي الشاعر أبو سلطان ما قصرت وأبدعت والله يعطيك العافية حضور متميز وعودة قوية بهذه القصيدة