ياعد لو انك مخيف (ن) وردناك = ولا قط جانا في اللزوم ارتباكا

ياقلب دوبك والقوافي تحداك = دوبك ولابه قافيه يصعب علاكا
عبد المعين اللي بيوته على ياك = قافه لذيذ وذقت منه الهلاكا
وياقاف لو انك بسوق جلبناك = كل (ن) يبي قربك وكل (ن) يباكا
وياعد لو انك مخيف(ن) وردناك = ولا قط جانا في اللزوم ارتباكا
وياقلب ما والله بيوم(ن) عصيناك = اعطيك ماتطلب وجالك مناكا
ابحث عن المطلوب وادور رضاك = ورضاك عند اللي سطع في سماكا
ماضنتي ياقلب خلك بينساك = ارسل له المكتوب مع ذا وذاكا
ارسل مراسيلك واعبر بدعواك = وقله ترى المرسل يتله هواكا
قله ترى خلك وصل حد الادراك = ماقساك في خلك وماصعب جزاكا
واضح تواصيفه وسرك لذولاك = بالخافي المقصود واللي دعاكا
ويازين ماينلام قلب(ن) تمناك = في ذمتي يازين ماكثر حلاكا
لو اقدر الهجران مثلك هجرناك = ارفق على خلك وش اللي دهاكا
كن القمر خمس تعشر في محياك = واسود سواد الليل ناعم غطاكا
وكن العسل يازين يصنع من شفاك = وعروق قلبي موتت من ضماكا
عينك وعين اللي على الوكر بشباك = وردف(ن) شلع بالثوب نابي وراكا
سبحان منهو يا اريش العين سواك = وياسعد من يرعاك واللي رباكا
وجدي على قربك ووجدي بلاماك = ووجدي على ماكون داخل حماكا
وصدر(ن) كما التفاح لارحم مجناك = وانعم من الديباج لمسة يداكا
لجلك نظمت القاف كله لعيناك = واكثر طعون القلب همسة نباكا
لو بكثر التوصيف تتعب مزاياك = محدن دخل بين الحنايا سوكا
ياورد ياريحان يامسك ياراك = وجدي على مقضي حياتي معاكا
يادر ياياقوت يالول محلاك = كل الجواهر ماتجي مستواكا
نصف الجمال الي يذكر تغشاك = والنصف الاخر في مواطي خطاكا
ياعنق ريمين ولا احدن تحلاك= من خلقتك محدن تجرى يراكا
ما امرك في وصلك عليّه ولا انهاك = كان الحنين اللي وطاني وطاكا
ويمناي تشفق يالصغير ليمناك= والبرد اكلني طامع(ن) في دفاكا
وجعل العذارى ياغصن موز تفداك = واستثني امي والبقايا فداكا
ياقل جنسك في الجزيره وحلياك= عذبتني يازين مكثر سحاكا
مالك حلي في الشام وديار الاتراك= والغرب كله لا ضواحي سكاكا
انته ربيت بنجد ياحي مرباك = خشف(ن) ربى في نجد وارض الدكاكا
جعل اللذي عني على البعد وداك = اللي قلع يازين عني مداكا
اللي سعى لجل القطيعه بفرقاك = واللي على ماقيل عني نهاكا
منا عليه تصك بقعا ومناك = وتذرف عيونه طول وقته تباكا
حتى ليا مني سئلته وش ابكاك = تذرف عيونه دم حر وعساكا

يالدلبحي هيضتني في مجاراك = لعبد المعين بقافيتكم علاكا
انا اشهد انك للتماثيل حباك = عسر المعاني في الشعر ماخفاكا
وانا اشهد انه خاسرن من تحداك= نجم(ن) سطع طفى هذاه وهذاكا
هيضتني ياحمود في حلو معناك =وذكرتني تاج الحسن والملاكا
غرو(ن) موصلني ليا حد الادراك = منه العيون القشر قامت تباكا
ياما نصحته قلت لا تسمع عداك = لا تسمع اللي بالنمايم تحاكا
ناس(ن) تبي تبعد خطايه عن خطاك = والمشكله يازين تعرف غلاكا
غلاك عندي مايعادل بالاملاك= لو جمعوا املاك هذا وذاكا
وجدي على من حط كفه بيمناك = وجد السجين اللي عطوه انفكاكا
وبعد وصوله قالوا الناس عزاك = الله يحسن يالسنافي عزاكا
امك توفت قبرها عانه هناك = واسباب موتتها توجد علاكا
ياما طوال الليل قامت تحراك= وكان امنيتها بس لحظة لقاكا
انا وجودي مثل هذا بلاماك = وبموت والله يالغضي في رجاكا
وانا اشهد ان الله يازين سواك = وياحظ من دايم عيونه تراكا
نصف الجمال اليوسفي في محياك = الله عطى يوسف منه ثم عطاكا
واستغفر الله كانها كلمت اشراك = الله وحيد ولا مع الله شراكا
بس الجمال اللي اشوفه تغشاك = حرام ماشفته بشخص(ن) سواكا
الريم لو تاخذ من الوصف حلياك = بدري عليها ماتجي مستواكا
ولو الحمامه قلدت فيك ممشاك = مصيرها تتعب وتترك خطاك
ولو النحل يذوق من حالي شفاك = يترك بساتينه وينزل حماكا
ولو بوصفك من هامتك لين ماطاك = يصعب علي اوصلّك منتهاكا
الخشم سيف الهند بيدين الاتراك = والعين عين اللي نصب له شباكا
وردف(ن) نبا على جليستك علاك= وشعر(ن) كما ليل الدجى من وراكا
واللول والمرجان يلمع على فاك= يشع نور اليا تبسم شفاكا
والخصر شبر ان كان يازين زدناك = والعنق كنه عنق ريم الدكاكا
الغره اللي ضاويه فوق عيناك = يسعد مساء الغره ويسعد مساكا
ضميان وابغى رشفتن بس من ماك = وعروق قلبي يابسه عند ماكا
حنّي على الماضي وعودي لذكراك = عودي على صالح ترى مانساكا
وتذكري وقت(ن) مضى كنت وياك = اقطف ورود الحب واقول هاكا
ولا قلت لك ياجعلني من فداياك = قلتي ترى عذبتني في هواكا
وقلتي ولو ان بيوم قلبي بيعصاك= قلت اقطع الشريان قبل يعصاكا
واليومه الحاسد قدر فيك واغواك = وقلبي عن الحساد ياما نهاكا
وكان التغلي بس يازين دعواك = تغل يالغالي وحقق مناكا
وان كانها الفرقى عسى الله يبلاك = بمصيبة(ن) يازين تمحق حلاكا
حتى ابوك ليا نظر فيك هباك = بهبوة(ن) توصلك حد الهلاكا
ويالله اللي كلنا نتبع رضاك = الطف بقلب(ن) مابغى الا رضاكا