خصني الشاعر المعروف (هاجوس) بقصيدة على هذا الرابط ..
http://www.shdadeen.com/vbq/showthread.php?t=25256
ورديت ..

عداد مانبت النفل والخزاما=وعداد ماهبت على العارض النود
يامرحبا بك يا حفيد الكراما=ياللي رقيت بشعرك الراقي سنود
من سال عنك ،وقال: كيف وعلاما=أعطيه علمٍ ثابت بختم وشهود
هذا حسام الشعر يا أهل الحساما=سيفٍ نفاخر به .. مجرد ومغمود
هاجوس .. وإن جا للقصيد أحتداما= حبلٍ على مزرقّة الجم ممدود
يرد ويصدر والضوامي حياما= يرهجله عدودٍ ويشربله عدود
لو أمدحه واقول ياما وياما=ما زدت في قدره ولاهوب مجحود
لكن صبوا لي رحيق المداما=راسي من الخرمه على القاف مصمود
كاسه من الفكر المعتق اليا ما=صبيتها ف اطرف شرايين .. تجود-
- قريحتي .. بعد عزوف وصياما=وتلقح وتنجب من بني شعر نمرود
قافٍ رضع مخ ونبت له عظاما=يلين من فصاحته كل جلمود
إنقاد لي من دون قيد وخطاما=أبني به حيودٍ وادمر به حيود
واقود به جيش الشعر بأنتظاما=حتى يصير لدولتي شعب وحدود
واليا استتب الامر لي وأستقاما=ودانت لي القيفان ضباط وجنود
طلبت من حاجب بلاطي لزاما=يطلق على راس آفة الشعر عبرود
تعزير والا حد والا أنتقاما=أهم شئ يسيّد الجزل ويسود
ويطرد فلول مروجين الخماما=بربر/ و ابو كحله/ و /ناعم/ و هدهود
عسى يديهم للشل والجذاما=وجعل السنتهم زاد للنمل والدود
في عهدهم صاب القصيد أنفصاما=شخصيته مابين ضايع / وموجود
حتى حصل فالذوق شبه أنقساما=ضاع الطعم مابين ناقد ومنقود
وأنا مضيع حاجتي فالزحاما=مرات أقود الركب ومرار مقيود
عندي من الصنفين ربع ونُداما=واللي يقول ابدعت أقول أنت كالطود
تطبيل والتطبيل مثل الغماما=واللي يصدقني من الناس مقرود
ولو شفتني عن الهزيل أتعاما =ماني وكيل آدم ولا عم مسعود
يعني مجامل؟ .. أي نعم بالتماما=ودولة قصيدك وين يا سيد سعود؟
وحكمك وتعزير الرخم والنعاما؟=وكركر/ وابو علكه/ وعادم/ وعنقود؟
خيال شاعر .. والقصايد "كلاما"=لكن فيها عمق الاشعاع مقصود
تحت البنسج / فوق الاحمر/ وغاما=تطعن شغاف قلوب وتفتت كبود
والأن عودي ياهجوس .. الهماما=واستلهمي زند وقديحه وبارود
لتفسير حلم أهل الرؤى والحلاما=اللي على رجوى ولا حصلوا فود
الحج مايقبل بليا أحراما=لكن عيد الحج والعود محمود
وأرفع كفوفك لا وصلت المقاما="وأقر تبارك وأختم بيوسف هود"
وأن كان تبغى من عروستك لاما=أنحر لها من نقوة الحشو مفرود

أبن سليمان