ياناشدي عن خير خلق الله لفا ذكره لفا=فيه القوافي ماتوّفي كل وصف لمنتهاه
طيّب ومن طيبه يطيب الطّيب في جهر وخفا=وتطيب به طيبه ابد ويطيب صحبه مع نباه
ماخاب طلاب لفاه وجوده الضافي ضفا=بعد الرجا بالله محمّد نال فضله من رجاه
اجزل تعابير الثنا واصدق قصيد مترفا=وازكى التحايا للنبي وابلغ سلامي والصلاه
عداد حبّات الرمال وعد مابه يحتفا=عد الكواكب بالمجرّات ومدا الكون وفضاه
في كل حال وكل حين يشع نور ماطفا=جلاه دين دان بالقران وبخير الدعاه
مكارم اخلاق تقلدها الرسول المصطفى=لا ما وصلها حاتم الطائي وجوده مع سخاه
سامي يتيم امّي تهامي كامل طيب ووفا=صادق امين وصافي النيّه حليم وبه أناه
منفق كريم وبالشجاعه ممتلي لين اكتفا=ويواجه امعاديه وجه لوجه مايرمي قفاه
في ريقه اصناف من البلسم وترياق الشفا=وفي وجهه الطاهر ملامح ترهب عتاة الطغاه
له في قلوب المسلمين اغلا الغلا الصافي صفا=مرموق في صرح المعالي عالي ما أحد علاه
بالصبر في لين وقسا سقم وشفا برد ودفا=ماجاوزوه الصابرين اجتاز والصبر احتواه
ودود لاصحابه خليل ان شاف له خلّه رفا=نوادر الحكمه توافق كل ماتنطق شفاه
مابين زمزم والصفا ساد ومع القدره عفا=عفو الكريم المقتدر عفو كسر شوكة عداه
أسوة امام للامم دامح مرارات الجفا=مجبر بهجرة موطنه بعد اقرب اقرابه جفاه
ضماه مع جوعه على رمضاه بأقدام الحفا=له من حصار الشعب منزال نقص زاده وماه
لو هو خفا عن منكر الملّه علينا ما خفا=متفوّق بالوصف عن غيره رفيع مستواه

صح لسانك
وعلا شانك أخوي
ولاهنت على القصيدة الجزلة

المشاركة الأصلية بواسطة : بنت النشامى (المشاركة 1399857) صح لسانك وعلا شانك أخوي ولاهنت على القصيدة الجزلة

المشاركة الأصلية بواسطة : السلطان (المشاركة 1399868) حياك الله يا أبو فهد والله يبيض وجهك على هذه الرائعة وأنت راعي الطيب والعلوم كلها لا هنت وتستاهل الشكر والاشادة وصح لسانك ملايين

المشاركة الأصلية بواسطة : سوكراَ (المشاركة 1399902) عليه افضل الصلاة والتسليم ، وصح لسانك سفير =’)