أنا يا هلي والله ما عادني ببخير =ولا جيت ابا اصبر زايد الصبر ما اطيقه
حداني الزمان وعزر الوقت بي تعزير =وعزي لقلب ٍ يابسات ٍ معاليقه
ولا لي جدا غير ابدي الرجم وقت عصير =وألاحي حمام الورق وألعب طواريقه
تحدتني الأيام واسرف بي التفكير=وأكن الحزن واخفيه داخل صناديقه
ولا ناموا السالين كني بحامي الكير =واسامر نجوم ٍ في السماء دايم امويقه
ويا تل قلبي تل دلو ٍ من اقصى البير = يتله غلام ٍ مونس ٍ بالصدر ضيقه
على صاحب ٍ حبه بوسط العروق ايسير = أبو لبة ٍ مثل القمر في تباريقه
والا يا حلي اللي ليا اوحى الحساس ايذير =عنود المها اللي راتع ٍ في زماليقه
احبه ومن حبه غدا لآهله تقدير = ومن اجله حشمنا كل نجد ومخاليقه
اباه ويباني مار جاء في الوصل تكدير = وكل ٍ حصل له ظرف عن خله ايعيقه
سقى الله وقت ٍ فات يوم الأمور بخير =قبل لا يغربلنا الزمان وتعاويقه
بعيد ٍ عن العذال والكذب والتزوير = زمان ٍ مضى لأهل الهوى فيه تشويقه
لكن الرجاء باقي مدام الطيور اتطير =وعسى الله يجمع كل عاشق بعشيّقه