الله من قلب ٍ طواريه في زود = يزود مع زايد لياليه همه
ما غير أدير الفكر وآروح وآعود = والعين عن حلو الكرى مستهمه
واهنيكم ياللي مهاجيع وارقود = أنتم بيمه والطواري بيمه
وأنا هواجيسي مصادير وورود = سهران لين الصبح شعشع معمه
وش حيلة اللي قدمه الدرب مسدود = وله لازم ٍ عيا البخت لا يتمه
غديت أنا والوقت حاوي ومردود = وعزي لمنهو ضيم الأيام سمه
يا طول صبري باذل ٍ كل مجهود = لكن أشوف الوقت ما فيه ذمه
اللاش تضحك له لياليه بسعود = وأهل الشرف تسعى لهم بالمطمه
وإن قلت حظي زان والنظرة اسنود = من دون شفي حال تسعين غمه
وحكم القدر ما عنه مجناب واصدود = والصبر طيّب والتشكوي مذمه
وحتيش لو الوقت قاسي ونمرود = وعن شف بالي ذقت مره وسمه
ما اهين روحي عايش ٍ عيشة افهود = واللي يهين الروح هذاك رمه