كل يوم نجم يسقط والنجوم إلهول=ونجم ماله نور فالأولى يصير تراب
والله إنم صرت هول الليل يا بالهول =الحديد الصلب ذايه صلب بيدك ذاب
في زمان صيّـر العاقل كما المهبول =الرجال بلا دقون وحلقوا لاشناب
وأصبحت بعض النسا ذا اليوم مثل الغول=العقاب أصبح حمامه والحمام عقاب
شيء معقول يصير وشيء مو معقول =واللبيب من المصائب رمش عينه شاب
والعرب بالأمس كانوا خور دون عقول =وحين باج الليل فجره كل شيء طاب
البيارق رفرفت وأوحيت قرع طبول =والرواسي فوقها تسمع نعيق غراب
بين مقتول وطريد وهاربٍ مجهول =وذا ورى القضبان مصكوكٍ عليه الباب
من تجاهل ثورة البركان جاه الدول =قدرة إللي في علاه يسبب الأسباب
والصنم ذا كان يعبد بالجزم مركول =والطواغيت إختفت من سدت المحراب
بقي طاغوتٍ بغى مافاد فيه حلول =ياعسى حل قريبٍ يبهج الأحباب
غير نخشى لا يعوّد همنا مدبول =حين لبسّنا الجهاد بتهمة الارهاب
وإستلم زيزومها كسرى من المخذول =وسترها مكشوف له واليوم دون حجاب
وسل سيف الغدر في عنقي وأنا مغلول =وأصرخ أبغى منقذٍ لكن حظي خاب
قاتلٍ لاما قتل يبكي على المقتول =خنجره يقطر وعينه دمعها عبّاب
وطال ليل الظلم والغدّار فيه يصول=تنبح كلاب الظلام بغيهب السرداب
من تقرب غادرٍ له خنجرٍ مسلول =يستحق إللي يجيه وذلفته لا غاب
والعمى يصرخ يبي الفزعة من المشلول =والشيم ماتت وصرنا لعبة الاغراب
وماصل لدار الجوار إلاّ وأنا مكفول=بعد حزبٍ واحدٍ صرنا فرق وأحزاب
ثورة الآمال ما توفي لك المأمول =والعروس يعافها الخاطب وهو خطاب
السفينة مالها اللا صاملٍ مفتول=ما ينام الفارس الصاحي وهو مرتاب
لاتجاهلني إلى مني ثنيت القول=فالحذر لك يالفطين وهزهز المشعاب
فالبحر لاماج طيفه يخفي المجهول=العواصف فيه تعبث والثلوج تذاب