لو القهر سهرّ عيونك وبكّاك
بعد التحيه والسلام ،،،
تعـال ناظر في عيوني وتلقاك=هم ٍ كبر وسط الضلوع الـنحايف
ياما سقيتك من حناني وأنا أضماك=وياما تجرعت القهر والحسايف
(لولا القدر ، لولا الليالي ، ولولاك)=ما صارت أحوالي مثل منت شايف
أزعلت ذولا لجـلك وبـعت ذولاك=وأنته ولا أنـت بحالـتي يـوم رايـف
قلي : من اللي شال همك وبـلواك=يوم إن كل ٍ عن مـماشيك عـايف
لا يا..... !! ماهو جزاي آترجاك=وأنا رفعتك فوق روس النوايف
لو القهر سـهرّ عـيونك وبكّاك=(إن كان قدّرت التعب والكلايف)
حملتني وزر ٍ على وزر ٍ فرقاك=وأصـبحت أنا والهم عقبك ولايـف
عمري وضيعته على كف يـمناك=لكـن على الله العــوض والخـلايف
وياللي بجوفي تحترق لو كتبناك=حـبر القلم ينشف وتفنا الصحايف
وياحظي الغابر وياوقت ما أقساك=وياعــــونة الله يالسنين العجايف
وتعال ناظر في عيوني وتلقاك=هم ٍ برك فوق الضلوع النحايف
فـهـد سـفـر
توقيع : فهد سفر | ياللي عيونك سواة الغاسق اليا وقب
احتار فيها السواد وضاع في لونها
الحاضر الملتهب .. والمقبل المرتقب
خلا العشاشيق فيك تلدّ بعيونها |
التعديل الأخير تم بواسطة ! سارة الغيد ! ; 15 Dec 2014 الساعة 11:39 AM
سبب آخر: تنسيق
|