يالله ياخالق عباده من الطين..=يامحصي نجوم" علينا مطله..
اعوذبك من كربة الهم والدين..=واعوذبك من عيشة" في مذله..
واعوذبك من وسوسات الشياطين..=الي على بعض البشر مستحله..
اهل الردى ومطففين الموازين..=الفاسدين اهل الفعول المخله..
الي فعلهم فالبشر يبكي العين..=كم فرقوا مابين خل" وخله..
جعل المنافق بالبلا قولو امين..=وياجعل بقعا عن بلدنا تشله..
هذا الزمن فيه العجب والعجيبين..=متغير" مثل اختلاف الاهله..
متغيره فيه الحكم والقوانين..=هذا الصحيح مثبته بالادله..
قد ثبتوه اهل الحكم بالبراهين..=وانا على حسب الضروف المحله..
صنفتهم حسب الفعل بالعناوين..=حسب الصفات الوارده والمدله..
احد" على روس القراب الموالين..=يشتال سيفه من رداه ويسله..
وخيره مثل وبل المطر للغريبين..=هذا ردي يبقى الردا في سجله..
واحد" معك عز الخوي حزة اللين..=عند الحكي ماحدن يحل بمحله..
وعند العسر خله يسار ورح يمين..=وان كان تقدر تبتعد عنه خله..
واحد"تشوفه تحسبه من هل الدين..=ولسانه اطول من رشا مضمحله..
دارج على الغيبه ومشيه بوجهين..=طعنة لسانه مثل طعن المسله..
واحد" قعد لاهو بونعم ولاشين..=يتعبك واهدافه على كل مله..
خبل" موصا في يدين الموصين..=معهم عليهم ماحسب كل زله..
عزي لحاله عايش" صفر الايدين..=وليا نصحته مادرى وش تقله..
منهم كثير وجعلهم من ورا الصين..=في مقطع' حتى الهوا مايصل له..
ناس المراجل عندهم بيت دورين..=والا رصيد وجيب لكسز وفله..
هذي مهازل والهزل للهزيلين..=لان المراجل في نجم مستقله..
كم من غني" في رصيده ملايين..=ومن جاه ناصي حطمه واستغله..
ان ماكسر نفسه عقد بالحجاجين..=والا احرجه زاده على الطين بله..
وكم من فقير" ماملك غير شاتين..=من جاه يبشر لو بغى البيت كله..
المال ياهل المال مفتاح بابين..=ان ما نفع راعيه والا يذله..
الا رجل يجمع على المال ثنتين..=جود ونبا يلقاه من جا محله..
هذا الصحيح ومابقى غير بيتين..=حقيقة" ماهي مقالة مجله..
الناس مقسومه بالافعال قسمين..=وكل" حسب عقله ورشده يدله..