يا لله الا يالله يا مالك ملوك = سبحانك اللهم ّ جلا جلالك
طالبك عفوك يالولي ثم نرجوك=يا منجي ٍ داوود يوم التجالك
تشفي لنا رجل ابتليته ومضنوك= صابر وينظر لك بعينه يسالك
يالله تجعل له شفا منك مدروك=انت الذي بيدينك أمره لحالك
يالله نصيتك والتجي فيك وأدعوك=عبدك دعاك ولاذ بك واشتكالك
واللي بعدها سجل القاف فالبوك = يا فكر سو القاف بعد استوالك
قاف ٍ جديد وبادعينه ومحبوك=بنين على سيسان ضد التهالك
يا مرحبا بالضيف ما فيه مشكوك= ضيف ٍ لفى يا حفلنا واعتنالك
بحلة ولد سلطان والباب مفكوك=يا ضيف لامن جيت يستر بالك
في حلةٍ والباب ماهوب مصكوك=تلقى شغاميم ٍ تلهب اقبالك
اليا وصِلت الباب بالطيب حيوك= والكيف بالرسلان دوبه صفالك
وخرفان مع قعدان فصحونها ابروك=ويا مرحبا واقلط وهذا حلالك
ياضيف بني حجري الياضفت سلوك=بسمن وسمين وكيف نكرم سبالك
ألاد حجري يوم داكك ومدكوك=يالخصم ما تنفعك مدة حبالك
اليا قردك الحظ قامو وتلوك= ويريعونك لين يظهر اهبالك
بمشوكٍ بأبمانهم لا تولوك=جاهلهم ليامنه تحزم عما لك
ياذيب تذكر كم من شيوخ عشوك=يوم المجاعه والليال الحوالك
واليوم فالاسلام في دبرة ملوك= الله يعز الدين والشرك هالك
ومبروك يابن عبيد مليون مبروك = مبروك عرسك يافتي واحتفالك
جيتك مهني وكل الاصحاب هنوك= عسى فرحك يدوم ويطيب فالك
والختم قاف ٍ لابن هلال مشروك=ما أمدحك تمدح ثم تثني أفعالك
طيبك وصل لاحد لندن وبنكوك=يا النادر الضرغام ماالقى مثالك
الله يرحم من على الطيب ربوك= وش صار في موضوعنا طاب فالك