على خطى سير القصيد برحلة احداث الزمن=ابني بيوت من القوافي وانتقي منها رصيد
نور البصيره دون قيد ان حارت عيون عمن=ولا كل قناص يصيد ان بان في مرماه صيد
الشور لاشاورت شور المستشار المؤتمن=مدّاته اقرب من مدى مدّك وهقواته بعيد
والعرف عرف العارف بسود الليالي لا اعتمن=مسراه في درب الدليله عن مساره مايحيد
والوعد للوافي عهد محسوب من ضمن السنن=والصدق منجاة الصدوق ومنبع الراي السديد
ان حال دونك مرخص روحه ولو جا من ومن=يلين للخيّر عطا ولغيره اقسى من حديد
صاطي وبه عزم عنيد ولو مراميها رمن=وان قال علم مايجيك الا بمدلول يفيد
مجوّد النيه مطيه بالخطام وبالرسن=يسلك بها درب يحيّر كل شيطان مريد
والاثم في بعض الظنون ومن يصدّق مايظن=نور الحقايق منجلي في دربها والجهل قيد
مايثمر الجهد الجهيد بحال زرّاع الفتن=ولا يعرف اسعار الغلا من يرخص العقد الفريد
ذكر الله ابقى واطلب الجنّه اذا قالو تمن=اطلب من الله وان عطاك اطلب من الخير المزيد
ولاتحسد ابن ادم على خير عطاه الله ومنّ=يامن تريد وهو يريد الله يفعل مايريد