أضـغـاث الأقـلام ما تعـني بحور الخليل=ودّك بــتــقـلـيـدهـا .. ولاّ بــتـجـديـدهـا
لـ أخطت قناعتك منها ما عطتك الذبيل=ولا يـنـفـعـك بين خـلـق الله تـرديـدهـا
وأنا عطيت الـقـوافي كل صـدرٍ جـزيـل=وألبستها عـقـد عـجـزٍ زان بـه جـيـدهـا
كله لـعـيـن الـوفـاء يوم الوفي ما يمـيل=قطفت عـذب المـشاعر من عـناقـيدهـا
حبيبتي كـل جـرحٍ من يديـنك جـمـيـل=الله يكـثر جــروحـي مـنـك ويـزيـدهـا
واللي عطاك الحلا وأعطاك طرفٍ كحيل=إن أجمل أيـام عـمـري معك يا عـيدهـا
تمرجحي وسط قلبي جعل عمرك طويل=وإسـتمـتعي بالحـياة اللي على قـيـدهـا
خلي همومك تغـادر حـان وقت الرحيل=فكّي قـفـول الحـنـايـا وأطلقي قـيـدهـا
وأنـا بما يسعدك ويـسـرّ عـيـنـك كـفـيل=ياللي عليك الـلـيالي طـال تـنـكــيـدهـا
أردّ طـرف المواجع عن جـنابك كـلـيـل=وآغيض الأيام في ضحكتك وآكـيدهـا
لا تحسبين السـعـادة ما تجي بالـقـلـيل=أحيان الأشياء تكـمـل عند تـجـريـدهـا
من (فيمتو الثانيه) في كيميا احمد زويل=شوفي صغار الأمور وعـُظم تـمـجـيدهـا
شالت زمـول المـحـبّـه كل حـمـلٍ ثـقـيل=والناس بـتـمـوت ما خلّت مــنـاقـيـدهـا
اللي يعرف الأمل ما يعرف المـسـتحـيل=وحـرايـر الـفـكـر ما ترضى بـتـعـبـيدهـا
قالوا قبل (كن جميل تشوف كلش جميل)=وأنتي جـمـال الحياة اللي على قـيـدهـا