يازين قلبي غلاك العذب مجتاحه=تسكن ركونه وتلعب في مسارحها
قفلت بابه عليك وضاع مفتاحه=والبستك التاج في الروح وجوانحها
لوكان تلعب على الشريان مرجاحه=روحك وملكك وسو اللي يريحها
يابسمة الكون ياضيه ومصباحه=آمر تدلل على روحي وفاتحها
غلاك في كل يوم يجدد مراحه=أما يمسيبها ولا يصبحها
واسمك حروفه قبال العين لواحه=تحجب علي الطريق الله يسامحها
ماتنمسح لو مسحها كل مساحه=والذاكرة ماتخل القلب يمسحها
يابو عيونن بضاف الرمش ذباحه=كنك برشاش "أبوعطفه" مسلحها
يالله دخيلك سوات الجيش نطاحه=داعيتن أمه عليه اللي يناطحها
وخدود(ن) أرق من منقا وتفاحه=هوا المكيف "على الواطي" يجرحها
أفرح بشوف القمر وازعل لمرواحه=لأن القمر فيه شي(ن) من ملامحها
لوشاركت في الجمال تفوز بالراااحه=تفرض على ريس اللجنه يرشحها
كريمة أخلاق..مزيونه..ولماحه=والله من احلى صفات الزين مانحها
صدري لها بيت لكن صدرها واحه=اعطتني احلى المشاعر من جوارحها
ماسمع بها كل شتامه ومداحه=هي صارحتني وانا ملزوم اصارحها
تخاف من كل هراجه وفضاحه=وانا عيوني عظيم الشوق فاضحها
ماهمني عاد لوتدري بي الساحه=خل الحسد شلته تترك مصالحها