في ذمتي ماطاك يسـوي قبيلـه=وهامتك يالمحبوب تسوي قبايـل
وفي ذمتي كل العيـون الكحيلـه=تكحل برمشك وانت راع الجمايل
ان قلت أوصافك تري مستحيلـه=أكيد أطباعـك وصوفـه جلايـل
وفي كل احوالك اشوفـك جميلـه=حتي الزعل له فيك ورد وخمايل
كثر القصايد فيـك تبقـا قليلـه=ما ينصفك شعر الملاء والمثايـل
وكيف القصايد عند غيرك هزيله=وألا ذكرت أسمك غدت بك جزايل
تبي الصراحه انـت والله مثيلـه=ماينوجد بين العـرب والحمايـل
دانه نفيسه مترفـه فـي خميلـه=في متحف آياتٍ تفـوق الكمايـل
وتصدق ان البيض عبلا وليلـه=منُك يغارو وهم تحـت النثايـل
ومجنونها اللي قال ليلـي عليلـه=يم العراق وصاغ فيها الهوايـل
لو كان شافك حطك انتي بديلـه=ولاهمته ليلـي ولا قـول قايـل
ياصاحبي ساعات ليلـي طويلـه=في غيبتك و العمر كلـه ملايـل
وان خيروني بين شمس وظليله=اخترت شمسك والعطش والقوايل
بس انت قدر من يساوي قبيلـه=بماطاك وألا هامتك عـن قبايـل