22 May 2009, 08:42 PM
|
|
لا تطري الفرقا
الـــى من لــــهــــا
لاتطري الفرقا تـرى القلـب ماعـاد=يصبر علـى جـور الزمـان وعذابـه
تعبت انـوح ولاهـب الشـوق وقـاد=ارجيك ميـر الحـظ مصكـوك بابـه
احيـل وآحايـل علـى طولـة المـاد=وامشـي علـى دربٍ تقطـع سرابـه
واجمّـع وجيـه التشابـه والاضـداد=وافرُق رموز الحكـي واللـي حكابـه
لقيت من عقب التعـب هاجسـي زاد=اثـر الاحاسيـس الدفيـنـه تشـابـه
حاولت اسلي خاطـري ميـر مافـاد=ماغيـر اهوجـس واتهجـى كتـابـه
خـطً لفانـي تالـي اللـي واقـتـاد=جـرحٍ تلـوى بالضميـر وسطـابـه
وشحيلتي لاوقـت فـي روس الاشهـاد=غير القصيـد اللـي يعيـش الرجابـه
يازين انـا مانـي عـن الحـب نشـاد=مـادام تربطنـا علـى الصيـت لابـه
ادري عـن الانـداد وانـداد الانـداد=وادري عن البلجيـك واللـي رمابـه
نـاسٍ تحاربنـي بـلا جنـد واعتـاد=والحـب ماهـو بالرجـا والحـرابـه
ياابعد من المريح واقـرب مـن الـزاد=في عين من حسـب عشانـك حسابـه
يااشرف من الاشراف يااروح من الكاد=يااسطى من السيـف البتيـع ونصابـه
ياابرى من الاطفال فـي روض الامهـاد=واصفى من الياقـوت داخـل جرابـه
طالبك ياجـمّ التـرف غـضّ الانهـاد=لاتتهـم المظلـوم واسـمـع جـوابـه
لا تستمع فاهـل الضغايـن والاحقـاد=عـد الـروى دايـم عـذيٍ شرابـه
انا اجودي .. وامشي على درب الاجواد=ودرب الخنى والـذل غيـري مشابـه
اشتاق لك واصبر على طعـن الاكبـاد=هذا قـدر مالـي ياكـود الرضـا بـه
خل المشاعر في فضا الصمـت تـزداد=واكتـم هوانـا لاتـدور الرحـا بـه
اخـاف وادرى فالرخـا كـل نقـاد=لايرخـي الاسمـاع حضـرة جنـابـه
فالنـاس نقـادٍ وفالـنـاس حـسـاد=اخذ الجواب اللي صـدوق الوفـا بـه
من بينـا فـي ساعـه العيـد ميعـاد=عـلّ الدقـايـق ننتهبـهـا نهـابـه
وان كان ماشفنا بعض وقـت الاعيـاد=نرسـل مشاعرنـا عساهـا تجـابـه
الله يعين اللـي رضـى الصبـر بعنـاد=علـى الليالـي والـقـدر واقتـلابـه
قال المثل فـي سالفـة عبـد الاسيـاد=من طاولـه سقـم الليالـي غـدا بـه
تعبت انـوح ولاهـب الشـوق وقـاد=ارجيك ميـر الحـظ مصكـوك بابـه
لاتطري الفرقا .. ترى القلب ماعاد=يصبر علـى جـور الزمـان وعذابـه
|