ما كل من قال لك قولٍ على صح = كم كلمةٍ تهرج على غير روحي
ولا كل من تبدي له النصح ينصح = ولا كل من جاب النصيحه نصوحي
ولا اكل من تبذل له الجهد يسمح = ولا كل من يطري السموحه سموحي
ولا كل من حاول طريقٍ بينجح = كم مرةٍ يصعب عليه النجوحي
ولا كل فايت بالمعاليق يجرح = بعض الفوايت منه تبرى الجروحي
ولا كل من يعرض على النفس يصلح = ولا كل نفسٍ للمعالي طموحي
ولا كل من حاول على الذبح يذبح = به ساعةٍ يذبح خطاة الذبوحي
ولا كل شرايٍ وبياع يربح = كم مرةٍ عنه المرابح تزوحي
ولا كل مداحٍ على الحق يمدح = ولا كل وأحد يستحق المدوحي
ولا كل من يقدر على الطرح يطرح = لابد يظهر للمطارح طروحي
ولا كل منهو يشتهي المزح يمزح = وأنا لزلات الرفاقه دموحي
ولا كل وأحد للقرابات يدمح = ولا كل مزاحٍ يعرف المزوحي
ولا كل صياد ٍليا راد يسرح = يمكن يفوتنه قنوصٍ سروحي
الصيد عن دربه يولي وينزح = ويبقى يطرد له حمامٍ بدوحي
يرجع تقلبه الهواجيس ما أمرح = وأما الحمام بروس دوحه ينوحي
ولا يكسب الطولات والمال من شح = الموت ما جنب خطاة الشحوحي
كم واحدٍ غره سرابٍ بصحصح = سراب قيضٍ بالمهامه يلوحي
كم واحدٍ في غبت الموج يسبح = وقت العواصف ما يفيد السبوحي
كم واحدٍ في غمرة الجهل يمرح = سود الليالي يطوعن المروحي
الطيب واجد والردى غيره أرجح = من كثر خلان الردى به رجوحي
وإن مال وقتك وإنهزع لا توحوح = لك خالقٍ ينظر و يقدر ويوحي
أصبر ولابد الموازين ترجح = الخير يقبل والندامه تروحي
لا بد كل إنأٍ بما فيه ينضح = كلٍ إناه بحسب رايه نضوحي
قلته وأنا ما أحب أطول ولا أشرح = لو نكمل المعنى تطول الشروحي
إيضاء وأنا من عرض من شاف وأفلح = بعض المكاسب ما تجيبه شبوحي