قالت لي امي ياولدي شف [شبابك]
وارفق على نفسك ترا الناس شافوك ..


شافوك متغير وحاضر غيابك
ومتشتت فكرك وللهم [مملوك] ..


وقالت لي اسمع كنت احس بصوابك
ابكي دموعي هم واشكي على [ ابوك ] ..


كنت ارتجي ظلك وماطر سحابك
ونسمة هواك اتشيل عن دربي [الشوك] ..


ارضى عذابي لجل اشتت عذابك
مابي تحس انك اذا طحت[ متروك] ..


عهد الطفولة كنت احضن ثيابك
لارحت تدرس وانتظرهم يردوك ..


واشرب بقايا مابقا من شرابك
لارحت مستعجل وخايف يخلوك ..


اساعدك تحفظ.. اجلد كتابك
[اضمك ] ان رديت متعب ومنهوك ..


اليوم ليش اليوم زاد اكتئابك
واللي يبونك.. من سواياك [عافوك ] ..


لاياولدي ارحم[ فؤاد] حيابك
لاتقطعه احزان وجروح وشكوك ..


قل لي علامك [قافل] اليوم بابك
عن ربعك وناسك كفا باب مصكوك ..


والناس اللي [تحرق لهم مابقابك]
مااظنهم كثر الذي فيك حبوك ..


ابسألك وانطر حبيبي جوابك
تدري بأن الناس [ما فـ يوم حسوك] ..


امسح دموعك لايخيب الرجابك
منت الذي يضعف [وينهار ارجوك ] ..


واقفت.. وانا ساكت وفكري متشابك
وجسمي كأنه بالسياجات [مشبوك ] ..


ناديتها [ يمه ] .. ذبحني عتابك
تكفين يمه.. [خلي الباب مصكوك] ..


: