شاعر شعته الشاعريه واعذب اشعاره بداه=والطيب ودروب الوفا له في نواحيها رسوم
فال السعد صدق الوعد وان باع حظّه وان شراه=بامثال من سبك الذهب تخلي خزاين من يسوم
ياما بدا وجه الصباح وغرّد البلبل غناه=بانغام يتردد صداها كل ليل وكل يوم
روض نسانيسه بعطر الورد ينعشنا شذاه=ويعج عود الطيب طيب يطيب وتطيب العلوم
جزايل اشعار وهجوس من القصيد ومن نقاه=والقاف وابيات القوافي ضمن عادات وسلوم
اسلم وسلّم واستلم بلسم يطيب اللي قراه=در الجواهر من بحور ابحر بها السبّاح عوم
يالله عسى غيث السما يسقي الديار بعذب ماه=تنبع بمنشاه العيون وبه يفيضنّ العقوم
من الشمال وللجنوب وشرق ولغرب اتجاه=مابين هامات السحايب والصحاري والحزوم
ديره بأثر ديره ينوض البرق في ليل سراه=يشاهده صبيان يام ويسمع اصداه البقوم
بارض الجزيره للجزيره من قبايلها حماه=لاغلا البرا واطهر ثرى وابها الفيافي والرجوم
ولا هنت ياقيف وقف قاف القوافي ماكفاه=بالحارث ابطال اللقا واقبالها مثل النجوم
مبدا تشاديه الكواكب في فضا الكون وسماه=نخبة مطانيخ السطر وابطال وزحول وقروم
عنهم تسطّر صفحة الامجاد باقلام الرواه=لا ذكرت اشبال النمور او جالت احرار تحوم
ماينحصي كثر الدروب وكل درب لمن مشاه=مشيئة الله والعطا مابين مدّات وقسوم
عن عزوتي بنيوس هم سقم المعادين الطغاه=هم مرهقين الكايدات وهم قويين العزوم
ولاهان فرسان الشلاوى صف شجعان دهاه=ياسعد من في جالهم يبشر بهم وقت اللزوم
والحارثي الناصري راقي رفيع مستواه=ان راز حمله وارتكي ينوع ويشيل ويقوم
و لكل شهم وحارثي بديار نجد وبالسراه=من بالمداين والقرى واقصى السواحل والتهوم
ذخر القبايل في وطنها دين عز وعز جاه=ياعل مااحد وان قسى وقته من الخير امحروم
تعجز حروفي والسبب بالمدح مانحصي مداه=لاماطفا جمر العرب هم ذخر دار وعز قوم
فيد الزمان اللي مضى من صد عن داه بدواه=وفال الزمان اللي يلي نحمد عسى النعمه تدوم
ولاهنت ياقافي عدد مايبلغ الوافي وفاه=وان بان خلّه من قصوري ياعسى ماني ملوم