أحلامنا و واقعنا
البرد والأحزان هي وأسمر الليل= والفقر والغربه وعيش البطاله
لاعاشها الرجال لو ينطح الخيل= لأحدٍ يساله بعدها كيف حاله
أحلامنا لو وصلت الجدي وسهيل= أخير من واقع ندور زواله
نعيش باحلامن سوات القناديل = أخير من نورٍ بعيدٍ مناله
والطيب بين الناس وهبه وتفضيل= كلٍ عطاه الله على قد حاله
لاخير في وقتٍ يهين المشاكيل= يلفهم سوات لف المحاله
ولاخير في مالٍ ليا ضمه بخيل= لا مدح فاد ولا تصدق بماله
ولاخير في رفقه بليا محاصيل= وقت الشدايد ماتقرب مجاله
ولاخير في رزقٍ يهين الرجاجيل= لامنه خير ولا ربح من رجا له
ولاخير في قومٍ على الحط والشيل= كلٍ يورد للمشاكل حباله
ولاخير في قرب الخبول المهابيل= ياقربهم من الردى والضلاله
ولاخير في منصا الردي بارد الحيل= من شاف حاله ياعرب لا يساله
انص الذي يصبر على العدل والميل= يتوق لعلوم الوفا والجزاله
بيته لعكفان الشوارب مداهيل= تلقا الشبب والكيف صفت دلاله
وكم بيت كان يعد من نادر الجيل= تلقا العزاوي واللجو في ظلاله
اليوم صار يعد مثل التماثيل= الجود والناموس غير أبداله
عساه ما تمطر عليه المخاييل= اللي يظن أن الشكاله جهاله
عيش الكفاف لواهن العظم وهزيل= أخير من مِنة ضعيفٍ يساله
حلفت لأبعد موطني دام لي حيل = عن قرب قوم المخطيه والنذاله
توقيع : حمد المحياني | المحياني |
التعديل الأخير تم بواسطة ! سارة الغيد ! ; 18 Mar 2013 الساعة 09:15 PM
|