يابو عشق يابعد دار الشدادين =ياليتهم بالنزل في دف جمهور
ربعٍ لنا من دون الأقصى والدنين =ساسٍ لنا ومنا ليا نفخت الصور
عز الصديق وضد عين المعادين = تشهد لهم بالفعل غياب وحضور
لباسة الجوخ الحمر والتوامين = وشلفاً مضاربها على مشة الزور
بظهور شهبٍ كنها الشياهين = ليا تواجه بالقاء كل مصطور
عذروبهم صاروا علينا بعيدين = اقفوا وصاروا حول ميسان والصور
راحت منافعهم لجمع العضاوين = ياسيفنا ياللي مقدمه صار مشقور
شرقيهم سلمان يم الأمرين=قطعانهم يرعن من عن وحدور
ياما رعوا بالقوس بين الحفيفين = من وادي قفر من الوسم ممطور
الله يجمع شمل نزع القحاطين = راحوا كما حبٍ مع القاع منثور
ياشيخ يانطاح جمع المعادين = عساك من صكات الأيام ماجور
لك موقفٍ يبرز بكل الميادين = ميقاف مجدٍ بين الأجناب مشهور
اللي برايك يرجحن الموازين = رجع لنا ربعنا وأنت مشكور