نبكي من الفرقى و يُبكى علينا = كثر البكاء ما فاد نمرٍ و سعدون
ننعى من الفرقى و ينعى علينا = الدايم الله و المخاليق يفنون
ندفن و يُدفن بالنهاية علينا = و لا حيٍ إلاّ بآخر العمر مدفون
نشكي مصايبنا و يُشكى علينا = ما ينفع الشاكي و من له يشكون
تنبهوا تُرمى وتاهم يجينا = خذوا زهاب الدرب قبل تمرون
يوم لنا الدنيا و حولٍ علينا = تمضي كما الأحلام و أنتم تشوفون
نضحك بها كيفٍ و تضحك علينا = تقول أنا هدّام للي تعمرون
ياما بها نركض و ياما مشينا = و طول الأمل خلاّك بالوقت مفتون
ياما بها ندله و يا ما سلينا = و ياما شربنا به من الهم و غضون
ياما بها بعنا و ياما شرينا = الربح مية و الخسارات مليون
باكر نخليها و لا إحنا اكتفينا = نروح و اللي من بعدنا يروحون
اللي خذا كتابه مع أهل اليمينا = يفوز عند اللي له الخلق يرجون
و اللي سقط يُكتب مع الساقطينا = في موقفٍ به راعي الدين مديون
تمت و صلوا عد وبلٍ غاشينا = على الشفيع اللي له الخير مضمون