ياهاجسي صخر جزال المثايل=زان القصيد وزان جو الشعر زان
للمجد صرح وللمواقف فعايل=ولطيب ساس وللبطولات ميدان
وللعز هيبه والفعل بالدلايل=وعيبٍ علي ان قلت من دون برهان
بقول عن قومٍ تهول الهوايل=العزوه اللي شانهم فالبشر شان
قومٍ لنا عدو على كل طايل=ميزانهم يرجح على كل ميزان
حنا بني شداد وقت الصمايل=عدونا لاشافنا صابه جنان
واللي بيجهل كاسبين الجمايل=بدري عليه انه تعلم ولو كان
ربعي لهم بالطيب صرح وقبايل=ودوله وعالم والفعل خير عنوان
ياما رعوا بالطرش قفر المسايل=سحج البكار اللي تباري لحيران
قطعانهم ترعى الخطر ماتسايل=يردون حوض الموت شايب وشبان
وياما تعلوا فوق قب الاصايل=قحص المهار اللي تكاظم بالارسان
وياما ذبحوا للضيف فالقصر حايل=مع كيفٍ اشقر والتراحيب صفطان
زبن الدخيل اللي من الهم شايل=واليا نصاهم تنجلي عنه الاحزان
حامينها يوم الفعل بالصقايل=ورمحٍ وشلفا والمشوك ونيشان
من دونها ترمى الشيوخ وتمايل=ويوطى تحت صم الرمك كل غلطان
فرسانهم تثني بوقت الدبايل=وكم طامعٍ لاجاهم يعود خسران
يوم الملاقى يهابهم كل عايل=ويهابهم فالعرف من كان فهمان
ولجارهم مثل الغصون الظلايل=وخويهم يحسب من حساب الاخوان
وعدوهم كنه بحامي الملايل=من خوفهم مايمرح الليل سهران
لا ولع البارود روس الفتايل=يطرب على صوت الفشق كل دوقان
كرام الوجيه وكاملين الخصايل=اهل الوفاء والجود ذربين الايمان
كبيرهم طب الكبود العلايل=وصغيرهم يشرب فناجيل الاكوان
تعشقهم الامجاد ولهم تخايل=سوات الارض اللي شفوقٍ للامزان
من غيرهم ماترتضي بالبدايل=تشوم لو جاها من القوم شجعان