قصيده وصور عن المقناص

يالبازعي طيري طلع مثل راعيه = زولٍ وفعـلٍ والمـواري تشابـه
بالطلع موقف ما لقي من يماريه =عساه يسلم سيدي يـوم جابـه
له ماكرٍ في بر فـارس محاريـه = كني اشوفه يوم خاطـوا قطابـه
صفاة وجهه مع شدوده توديـه = ضمن الحرار ولا وراها طلابـه
النادر اللي يوم عزمـت اسميـه = سميته السامر واشوفـه زهابـه
ليـا قفيتـه شفـت دقٍ محنيـه = وليا نطحته من عيونـه تهابـه
كن الثريا في قواطـي مواميـه = ابيض نحر كنه يشع الضوا بـه
هجرٍ قصيرالساق جبره ثناديـه = وله عاتقٍ يعطي شموخ ومهابـه
ليا مسح وجهه ونهض مواطيـه = يطري علي اللي عزيـزٍ جنابـه
به من طبوعه مشبع اللي حواليه = وماخذ من طبوعه ليان بصلابـه
وجهه ليامن صاد يشبه محاليـه = لا بشر بضيفٍ وردد هـلا بـه
لا تل سبقه قلت يا طيـر لبيـه = واقفى وكني كاسبٍ بـه ثوابـه
وجاهن وهو كن المنايا تباريـه = زيزوم قـوم وفزعـوه القرابـه
اللي معه بالطلع ما عـاد يمديـه = ياصل مطاليعه وهو ما درى بـه
من عادته برق الدواغر مداميـه = في صيدته الطير غمقٍ صوابـه
ليا ضرب ما وافق الضرب يفريه = كن بيمينه من سيوف الصحابـه
ينقى كبير العرف ما هو يخليـه = من خيشة قدمـه نهبهـا نهابـه
يا سعد عين اللي قنص عانيٍ فيه= طيرٍ وماخذ من طبـوع الذيابـه
لا صارت الدعوى عناد ومشاريه= إخذه وكنك ماخـذٍ معـك لابـه
الطير احبه حيل من حب راعيـه= عبد العزيز اللي عزيـزٍ جنابـه

وهذه الصور مشاهده ممتعه













تحياتي : الغريق

والله ونعم العلوم
ونعم الصحبحة الطيبين
لا هنت يا الغريق
وألف شكر لك على إجابة الدعوة

هلا حياك يالسلطان
وحي هالطله
ولا شكر على واجب هذا واجبنا يابو عبدالله

الله يعطيك العافية يا الغريق

دمت بخير

كفييت ووفييت يالغريق

صور ماعليها تعليق

100%

تحياتي

يعطيك الف عافية

ابيات حلوة
و
صور حلوة بس الاخيرة تحزن

ماقصرت

صح لسان الشاعر
وسلمت يمناك أخوي / الغريق
على النقل المميّز والأختيار الجميل
تقبل مروري
دمت بخير ,,,

سملت اخي الغريق على هالقصيدة الجميلة والصور
والله لايهينك

الله عافيكم جميعاً ولاهنتوا عالمرور

سلمت أياديكم والله يخليكم