ناصر الحربي.... يرد على قصيدتي له ...

اقدم لكم رد الشاعر الرائع ناصر الحربي..على قصيدتي الموجوده على هذا الرابط...
http://www.shdadeen.com/vbq/showthread.php?t=13627

الصوت....(ماحط في جيبه دهتن ومناديل)

سلام يانسل الرجال الحلاحيل=اهل العلوم الغانمه والجميله
يابحر ياشلال يانبع ياسيل=يافارسٍ قوافي الشعر خيله
ياللي بيوتك مبهمات ومفاتيل=الشطر ثابت والمعاني ثقيله
من شوقي الشاعر الى شاعر النيل= كلٍ من الشعار قافه دليله
ياجيل في شاعر..ويا شاعر الجيل= الحرف يطربني صداه وهديله
وأبدع مع أهل الشعر قاف ومواويل=وأرافق اللي قربهم ينعني له
الطيبين..الطاهرين..المشاكيل=طب الكبود المعطشات العليله
أحبهم بالحيل بالحيل بالحيل=بالطيب حازوا كل خصلة نبيله
أختص ناصر خُص من دون تاويل=حرٍ رقى فالقمة المستحيلة
من كان يبغى من علومه تفاصيل=السيف تكفي لمعته عن صليله
أعمل لدمه فالمعامل تحاليل=تلقى المراجل في عروقه فصيلة
ولو للوفى والطيب وزن و مكاييل=رجح على كل الموازين كيله
مثل الجمل يركي للاثقال ويشيل=يابعد ناهاته وياقو حيله
راع الدلال الصفروالبن والهيل=ياعل تفداه الكفوف البخيله
أبن بدوي..ماعاش في جو تدليل=ولا أفطر على الببسي وصحن البليله
ولا حط في جيبه دهان ومناديل=أخشن من اللي مارقد طول ليله
ذيبٍ سرى والوقت مقرود وبخيل=وجر العوا فوق الرجوم الطويله
في البر يتلى الفطر الشيب والحيل=وزاده لحم صيده و خبز المليله
مع سربةٍ خيالهم يرعب الخيل=فرسان حرب..انعم بها من قبيله
ضعونهم تمشي مقافي مقابيل=في قفرة فيها يضيع الدليله
اليوم نزاله وبكره محاويل=برقٍ رعت نبته وبرقٍ تخيله
هذا الصحيح ولا نعد الاباطيل=مجدٍ كتب فاللوحه المستطيله
وهليت له من نو قافي هماليل=يهل هتانه ويدرج مسيله
قافٍ سبكته غير عن كل ماقيل=أهل القصيد اعرف بعدله وميله

سعود


الصدى....(التحيه كاش ماهي بتحويل )

هات القم ياعناد هات المعاميل=عطني من البن اليماني وهيله
بطلق سراح المفردات المكابيل=وسج واخذ لي مع الطرق شيله
حي البيوت اللي لفتنا على ايل=واخر مطاف الشطر ياقف بأيله
من شاعراً ياقوى شعره تهاويل=من قوى شعره شاعر المستحيله
ياسعود نقراها من الصبح لليل=القاف يعجب والمعاني جزيله
يالشاعر اللي فصل القاف تفصيل=يجمع عميلاً بالوفاء مع عميله
شاعر تثيره مفردات الرياجيل=واليا كتب من راي راسه حصيله
بيطار ماخلا علاها مداخيل=الله يقدرنا برد الجميله
افخر بعرفك ماش شكً وتبديل=قول وفعل كلن يطابق خليله
حراً ولد حراً ولا تقبل الميل=والا الردي لعل ربي يشيله
ياسعود عندك دبل الطيب تدبيل=اخذت من نبعه وصرت اتهدي له
من لابتن يوم المعوشه بهاذيل=يردون عداً صافي سلسبيله
اليا اعتلوا قب المهار المصاهيل=عدوهم يبكي ويرثي قتيله
اقولها مافيه ريبً وتضليل=اصغر فتى فيهم يزبن دخيله
واخذ التحيه كاش ماهي بتحويل=من شاعرأً كله وفاء مع قبيله

ناصر الحربي

من شاعراً ياقوى شعره تهاويل=من قوى شعره شاعر المستحيله
ياسعود نقراها من الصبح لليـل=القاف يعجب والمعانـي جزيلـه

ونعم ونعم يا أبو طارق

وما قصر ناصر الحربي

وتمنيت لو تسوي له دعوة للمشاركة معنا في المنتدى

ختاماً

صح لسانك وصح لسان الشاعر الحربي

ولا هنتوا والله ما قصرتوا

سعود الحارثي

صح لسانك وصح لسان الحربي

صدى وصوت من روائع ما قرأت



كل الأعجاب والتقدير

صح لسانك ولسان ناصر الحربي

فعلآ كان البدع والرد من اجمل مااسمعت

اشكرك اخوي سعود

ياسعود عندك دبل الطيب تدبيـل=اخذت من نبعه وصرت اتهدي له

تهدي له

جزل ياسعود والشاعر الحربي جزل وصحة السنتكم جميع

بيض الله وجهك يا نابغتنا وصح لسانك

قصيده جزله والرجل الممدوح كفوا

لاهنت يا سعود

ولاهان راس ناصر الحربي

		المشاركة الأصلية بواسطة : السلطان اقتباس
	من شاعراً ياقوى شعره تهاويل=من قوى شعره شاعر المستحيله ياسعود نقراها من الصبح لليـل=القاف يعجب والمعانـي جزيلـه ونعم ونعم يا أبو طارق وما قصر ناصر الحربي وتمنيت لو تسوي له دعوة للمشاركة معنا في المنتدى ختاماً صح لسانك وصح لسان الشاعر الحربي ولا هنتوا والله ما قصرتوا

ماعليك زود يابو عبدالله.....
وصحت ابدانك....
وان شاء الله نجيب ناصر الحربي.....
مثله ودك ينظم الينا...