قراءة في أشعار الفارس / دابان بن حمد الشدّادي

** التعريف به :

هو دابان بن حمد بن مبارك
شاعر وفارس من بني عواض من الدماشقة من الشدادين
أقام في الأحساء فترة وجيزة لا تزيد عن السنة
له قصائد في أغراض متعددة ,, تناقلها الناس فيما بينهم
من جيل إلى جيل .
ولكن مرت أيام وسنين وأصبح الكبار لا يتذكرون من القصيدة إلاّ بيتين أو ثلاثة
قد يكون مدوّن ومحفوظ عند أحفاده , وإن كان كذلك فبحثي مجرد محاولة ..



* أولا ً :
هذه قصيدة له عندما كان في الأحساء وتوفيت زوجته وابنه عايش
قال في هذه المناسبة قصيدته المشهورة ويسندها لأبو نورة
عواض بن معيض من البدوة من بني مقبول :

ياقلبي اللـي منقلـي ٍ قليـة البـن=إن حـده الحمـاس فـوق الملايـل
يا راكـب ٍ هجـن ٍ للأبعـاد يدنـن=أكوارها تصـرخ صريـخ المحايـل
مريـحـات ٍ مايـكـدر عليـهـن=ترعى الزهر من نبت عشب المسايل
أكواعهـا لـزوارهـا ماينوشن=فـج العضـود مدايمـات الشلايـل
يجانبن الحفـر بوصـوف اهلهـن=جهـال ماتمشـي يقـع بالـدلايـل
ملفاك أبو نورة ليـا شافهـن جـن=شعشوع ماتمضـي عليـه الحبايـل
اللـي يرحـب بالركايـب وأهلهـن=ليا أتقـى عـن دربهـن المخايـل
ثم أخبره عن ماجرى وافـي الفـن=باح الدبـش ماباقـي إلا ّالرحايـل
ياونتـي ونـة كسيـر ٍ لـيـا ون=من حينا اللي مابقـى لـه عقايـل
لـو الدمـوع اللـي يفيضـن ردن=يا ما يرد الدمـع مـن كـل عايـل
بقعا كفى الله شرها تخلـف الظـن=تلعـب بخبـلان القلـوب الهبايـل
هاذي هجـور ٍ مقفيـات ٍ بأهلهـن=من باب أهل صنعا ليا بـاب حايـل

* وهذه أيضاً قصيدة يوجهها لـ / عواض بن معيض " أبو نورة " يقول فيها :

البارحة نـوم العـرب مـا هنانـي=والجوف كنّ محـرّق فيـه تحريـق
يالله ياللـي تطّلـع فـي المعـانـي=يـا معتنـن ٍ بضعيّفيـن المخاليـق
طول المدى والبعـد عنهـم حدانـي=وش مصلف ٍ بالي وأنا كان ما أضيق
ريّضـت عنـد مشيديـن المبانـي=أهــل دلال ٍ كنّـهـن الغرانـيـق
مصروفهـنّ الهيـل والزعفـرانـي=والبن الأشقر حرّقوا فيـه تحريـق
ذباحـة ٍ للضيـف حيـل ٍ سمانـي=حيل ٍ تعلّـق فـي طويـل المعاليـق
وبيوتهم مثـل الختـم فـي البيانـي=يوم الردي بيكي ليا يبسـت الريـق
ياراكب ٍ مـن فـوق بتـر المثانـي=قطـم الفخـوذ مقطعـات الرقاريـق
مـا ياصلنّـه كـود ليلـة ثمـانـي=نحايف ٍ مـن ضربنـا بالمساويـق
ملفاك أبو نـورة زبـون الحصانـي=زبن الحصان إليا قسى في الملاحيق
يوم أشهب البـارود لـه حندوانـي=وإن ثار وخر الجيش عند التفافيـق
حتـى تقفّاهـم صـدوق الغشانـي=من مجحف ٍ برقه سرى له تفاهيـق
جيرانهم مـا قـط تشكـي الهوانـي=عسى لهم عنـد المغانـي توافيـق
يتلون في المربـاع عـربٍ سمانـي=وإن زاد مع نبت الشقارى زماليـق

*هذه الأبيات قالها بعد خلاف حصل بين الأمير شرار بن مهرس وبعض جماعته ولما سمعها الأمير شرار رضي عنهم :

تغيب عين الشمس وإنّـا مانغيـب=والطير أبا الجنحان نرهي له عشاه
في رآي ابن مهرس معشّي كل ذيب=يآمن به الخايف ويمشي فـي ذراه
ما غاب عنّا غير من عاف النصيب=ذلٍ مـن الهجـرة تغـرّه بالحيـاه

*له رحمه الله عليه العديد من العرضات متنوعة المناسبات
والعرضات تتميز بقلة عدد الأبيات لا تتجاوز في معظمها ثلاثه إلى أربعة أبيات منها :

عزوتي نوء صيف ٍ غطى الأوطاني =زاد وبله وضاقت به مناحيبه
جبرنا المتعبي هو والعضياني=مخبل اللي لباسه عنه يرميبه
إن صفقنا على الأقصين والداني=ينزح اللي خبيثات ٍ مشاريبه

فرد عليه شاعر يقال له مضيران أعتقد إنه من ناصره بقوله :

إن نزل بين قصد وبين نشراني= مابي إلاّ يجيه الذيب يسريبه

فاجابه رحمة الله عليه برد حكيم ورزين قائلا ً:

لا تسب القبايل يا مضيراني=ما كريم ٍ تشنى في معازيبه
إن شناني رفيق ٍ يفزع الثاني= تنقبح لحيته والشين مالبيه

وله أيضاً عرضه مشهوره بالفخر والعزة يقول:

عزوتي من رؤس بنيوس فأيام العموس=ما نكاتب عند حي ٍ يجاهد عندنا
إن نزلنا بين سموا القبايل بالفلوس= إحسبونا من بني سيد وأهفوا جدنا
مانزلنا غير بالمرت ماحيت الدروس=عقب اللي طامع ٍ في موارث جدنا

(يذكر رحمه الله بنوسيد وهم عائلة ليس لهم أصل )
ويذكر أيضا ً (المرت) وهي نوع من البنادق المشهورة
والمميزة في عصره وتسمى أيضاً (المارتيل)



وله أيضا ً بيتين نظم جميلة يقول:

يالله ياللي نمد الضيف من مده= لولا عطى ربنا ماكان مدانا
إن جاد حظ الفتى جاله على وده =سوى له الله وقال العبد سوانا

* قصيدة غزلية نادرة للشاعر 00

ما دون ساهي العين من راقد اللاّل=من قيذل ٍ من دون خلـي يبينـي
ما عاد نوصلهم يقع فوق مرمـال=وإلاّ على عوص النضاء محرميني
ياراك جاك من الهماليـل هجّـال=يا علك الودان عقـب الغشينـي
حيث إن فيك سهيّف الروح ما حال=منازله لـو كـان دايـم سنينـي

* وهذه من أبياته فـي الحكمة وصواب الرأي ناتجة عن ومدى خبرته في تجارب الحياة

عزّي لقوم طقها في عصاها=وطق العصا مما يخل العـود
ريع على ربعه اثنين وثلاثة=عيونٍ تخازر والضماير سود

*وهذه القصيدة لوالده حمد بن مبارك في ناقته سبلاء عندما نـُهبت :

العذر من سبلاء لو إنّا على الجيش=لنـرد سبـلاء تنثنـي للحـوارى
لكـن مـا نرميهـم إلاّ تناويـش=هذا على أيمنهـم وهـذا يسـارى
حيرانا مثـل الطفـال المحاويـش=أمست عقب سحج الخلايا وقـارى
لولا لحقنا مثل ابن جبـر وقليـش=وجبّو رشوق اللي تكـد الجمـارى
كان اختلطنا عند عرب هشاهيـش=والروح ما ياقـاه كثـر المـدارى
أمّـا نعديهـم بعلـط النواحيـش=وإلاّ يقفّـون السـلاح العشـارى

* من قصائده :

سجّي بنا يالهجن لاعاد تمشين=وأعطي بنا مع كل حزم ٍ فياحي
سجّي بنا مع درب عربٍ مزايين=وإن وسعن صدورهن بالمناحي
يبنّ مصيافٍ عن الفند ويميـن=مع رقةٍ بيضاء وعـدٍِ قراحـي

*** وأخيــراً :

هذا ما توصلت إلى جمعه وتدوينه
أتمنى ممن يلاحظ نقصان أو أخطاء أن يذكرها
وجل ّ من لا يخطئ 0 0






اعداد وبحث / شموخ شدادية

اختي
شموخ شدادية
الله يقدي لهم فيك عقب هالكفالة لقينا هالبحث والاعداد
الله يرحم شاعرنا الفارس دابان بن حمد الشدادي وكل فرسان الشدادين
شكرا لك على السيرة البسيطة
ودمت

سيرة طيبة لشاعر من فرسان الشدادين
وعسى الله يرحمه ويرحم الجميع

هذا نتاج من ذلك الموضوع
وياليت يا شموخ نجد أكثر من هذا لديك

سلمتي ولا انُحرمنا منك ومن مواضيعك الهادفة

ما شاء الله تبارك الله يا شموخ

بحث مختصر وجميل جداً عن هذا الشاعر الحماسي رحمه الله

ورحم جميع أمواتنا وأموات المسلمين

وفقك الله لكل خير وأعاننا وإياك عليه

وشكراً من الأعماق

الله ...............الله..................الله......... .........الله
على هذا البحث الجميل الذي تستحق من أعدته درجة 100%
فعلا ً بهمتها العاليه وطموحها للحفاظ على تراثنا الادبي أستطاعت الاخت شموخ أن تجمع من
كبار السن جواهر ودرر وتظعها في كنز أدبي مميز وهو عباره عن بحث مصغر في سيرة علم
من أعلام الشعر البارزين وفارس من فرسان قبيلة الشدادين ومشاهيرهم
والجميع يؤمن بأن الشعر لايحفظه إلا تدوينه
فلها مني نيابةً عن جميع أحفاده كل الشكر والتقدير
فإلى الامام اخت شموخ واصلي مسيرتك أسأل الله أن يوفقك
لنيل ماتطمحين له وباذن الله نراك من كبار المؤلفات الباحثات وهذا الشئ فخر لنا
ولكي ولكل القبيله ولن يبخل عليك أحد بما لديه من قصائد لهذا الشاعر
ولغيره من شعراءنا وفرساننا الافاضل
أبدعتي في صيغة الطرح ودقة التدوين وجمع المعلومات
فهذه خطوه أولى في طريق النجاح وكسب ثقة المتلقي بدقة بالباحث
فالمثل يقول الكتاب من عنوانه وانتي في بحثك هذا أبدعتي حسب رأيي
ولغيري آرائهم ولكن كلي ثقه بان طرحك هذا سينال إعجاب الكيثر من الاعضاء
فلا تقفي عند هذا الحد وأجعليه خطوه أولى في طريق الابداع
وإن شاء الله ستجدين مايسرك
وفقك الله ونفع بك
ودمتي بخير

مشاءالله عليك ياشموخ وين كنتي مخبيه هالمواهب

عيني عليك بارده

ان شاء الله تكون لك عاده

لاتحرمينا من جديدك

تحيتي

		المشاركة الأصلية بواسطة : متفائل اقتباس
	اختي شموخ شدادية الله يقديلهم فيك عقب هالكفالة لقينا هالبحث والاعداد الله يرحم شاعرنا الفارس دابان بن حمد الشدادي وكل فرسان الشدادين شكرا لك على السيرة البسيطة ودمت

حياك أخوي متفئل

أوّل مرة أحس بفخر في شي قدمته

شاكرة لك مرورك وتواجدك

		المشاركة الأصلية بواسطة : حاتم الشدادي اقتباس
	سيرة طيبة لشاعر من فرسان الشدادين وعسى الله يرحمه ويرحم الجميع هذا نتاج من ذلك الموضوع وياليت يا شموخ نجد أكثر من هذا لديك سلمتي ولا انُحرمنا من مواضيعك الهادفة

حيّاك أخوي حاتم

ورحم الله موتانا وموتى المسلمين

شاكرة لك تواجدك

		المشاركة الأصلية بواسطة : السلطان اقتباس
	ما شاء الله تبارك الله يا شموخ بحث مختصر وجميل جداً عن هذا الشاعر الحماسي رحمه الله ورحم جميع أمواتنا وأموات المسلمين وفقك الله لكل خير وأعاننا وإياك عليه وشكراً من الأعماق

السلطان

أسعدني هذا التشجيع

مشكور لتواجدك

وجزاك الله خير

تسلم يمينك اختي شموخ الله الله على البحث المميز لشاعر

والفارس دابان بن حمد الله يرحمه

ويرحم اموات المسلمين لاتحرمين جديدك الله يعطيك العافيه