مداهيل الحرف

رسالة من أبو محمد :: حريميس بن عويض ::

بالله يا فيصل تعلم وش تقول وش تشوف= عان المشاكل قدم عينك يابن مهرس عانها
عان المشاكل قدم عينك بالميات وبالالوف= يالله وإنك ترحم الأمة وتصلح شانها
مر ٍ يجينا عج وامرار ٍ يجي حر وكسوف= نصف البشر قدام عينك راقص ٍ شيطانها

ورديت عليه بهذي الأبيات . . .

يابو محمد لا تهيّضني وأنا قلبي شغوف= احاول ادله مار ثوّر قدمنا بركانها
أشوف لي ذيب ٍ حمر يركض وله قصد وشفوف= والبندق اللي في يد الرامي خرب نيشانها
والأمة أمست يالسنافي بين أمان وبين خوف= مدري تزيد أفراحها وألا تزيد احزانها
وأما العوارف قالوا أقدم ما على الفايت حسوف=. والأمر لله عالم ٍ سر البشر وإعلانها

صحت الالسنه وتعافت الابدنه
ردية رائعه وجزله
واصل ابداعك يابن مهرس ومتابع لك
تحيتي لك

		المشاركة الأصلية بواسطة : بدر الشدادي اقتباس
	صحت الالسنه وتعافت الابدنه ردية رائعه وجزله واصل ابداعك يابن مهرس ومتابع لك تحيتي لك

صح بدنك يا بدر

ومرحبابك والله ومسهلا

وتأكد إنني أتشرف بمتابعة اللي مثلك وشرواك

سلمت ولاهنت يابن العم

كريم يا برق ٍ شعاني رفيفه
.......... جعله على الباضه وهاك المداهيل

جعله على الباضه يسبّل قنيفه
.......... ومن الرحيا لا تغوثين تسبيل

ويسقي الامرين الجبال المنيفه
.......... وعلى خشوم الزرب جاله هماليل

ديار جدي اللي حماها بسيفه
.......... على ظهور المسرجات المشاويل

زيزوم ربعه في السنين المخيفه
.......... الاد شداد الدهاه المشاكيل

اهل الصخاء واهل السلوم الشريفه
.......... ويوم المواقف يكسبون التنافيل

وأليا اعتلوا فوق المهار العسيفه
.......... ترعابهم شقح البكار المباهيل

ترعابهم في مرتع ٍ فيه خيفه
.......... غصب ٍ على اللي ينقلون المفاتيل

وان صاح صياح ٍ براس الحتيفه
.......... جنه كراديس السبايا مقابيل

دون العشاير روس ربعي صليفه
.......... وكم شيخ قوم ٍ حولوبه من الخيل

وامسى عليه الذيب يهرف هريفه
.......... والطير جاله فوق راسه محاويل

جنابنا للي ايحربنا يعيفه
.......... ولضيوفنا عز وكرامة وتبجيل

ولجارنا مثل الديار المريفه
.......... محشوم ما يلحق على جارنا الميل

والناس ما اظلمهم بكذب ٍ وزيفه
.......... يا كثر ما فينا وفيهم حلاحيل

ولا يلحق اعراض البشر غير جيفه
.......... خبل ٍ يحسب السب فيد ومحاصيل

في أحد الأيام قمت بزيارة الأخ العزيز الشاعر / فهد بن تركي بن دعيرم الخالدي وقلت هذه الأبيات

،

،


جيتك مسير يا فهد يا أحمر العين
.......... وإن جيت ابو تركي يزيد انشراحي

رجل ٍ عزيز ومن رجال ٍ عزيزين
.......... روس الخوالد كاسبين المداحي

اللي ليا جاء الضيف فزوا امهلين
.......... وهذي عوايدهم طيور الفلاحي

ولا جيتهم غال ٍ مسير لغالين
.......... ما اعد نفسي ضيف يا ابو مناحي

ما كني ألا في احلال الشدادين
.......... وألقى وناسة خاطري وارتياحي

وقلبي يحب الطيب والمذهب الزين
.......... والعمر سجة تاليته البياحي



ورد الشاعر فهد بن دعيرم بهذه الأبيات

،

،

أن جاوب الهاجس على فرحة العين
.......... زيده رعد رعاد والبرق لإحي

يبراله الخاطر شبوح البعيدين
.......... آليا لفا نون مع الوسم طاحي

واليوم ما حنا جهود وكليفين
.......... الضيم زاح وكايد البين زاحي

من عقب ما سير أمير الشدادين
.......... نزهم عليه أيام ماهو بواحي

يأمرحبا يأمرحبا والفن أهلين
.......... يللي عليك الورق من شرق ناحي

شفقن على وصل الرجال العريبين
.......... اللي اعده في زماني رباحي

يأكون ابو زايد له الخاطر إيلين
.......... فيصل ابن مهرس له العود فأحي

جاه ووجاهه من مياسير وأيمين
.......... ما كنه إلا رزقنا بالصباحي

يأكثر ماعز الخفوق العزيزين
.......... لكنه يفرق كونه الرجل صاحي

آليا هرج قدله نباهه وتثمين
.......... وليا بدأ اللازم قوي الجناحي

طلعه بعيد ومخلبينه مسانين
.......... ؤاللي يبشر بالزخم والصياحي

أي والله أصرح وحنا جريين
.......... وعن قولتي أقول ماني بساحي

من عقب مإأختم برجح الموازين
.......... ياليت تسمع هاجسي واقتراحي

ليتك لزيم الشوف حينن على حين
.......... ؤمن راح يبراله مع العج ماحي

رسالة جوال من الأخ العزيز :: طالب بن عواض الحزيمي الروقي العتيبي ::

،

،


ياليت أبو زايد معي طول الأيام
.......... وأجلس معه واعطيه كل العلومي

والعمر فاني لا تحسب للاعوام
.......... وانته خويي لا ذكرت القرومي


ورديت بهذي الأبيات

،

،

جانا من الاد الحزيمي خبر هام
.......... وقلبي يحب أهل الوفاء والسلومي

حييت يا طالب عدد ذاري الانسام
.......... يالصاحب الوافي قوي العزومي

أرجوا لك التوفيق من رب الآنام
.......... وأقول جعل سنين عمرك تدومي

يالله إنا طالبينك يا معين
.......... تنصر الإسلام وتذل الطغاه

النصارى واليهود الغاصبين
.......... هم هل الارهاب من ماضي الحياه

وأنت يالجاهل ترانا راحلين
.......... في لحود القبر لا رزوا حصاه

ما على الدنيا خلود ولا ضمين
.......... الخلايق فانيه غير الإله

أغتنم فرصة شبابك يالذهين
.......... بالصلاة وبالصيام وبالزكاه

يوم ما ينفعك لا مال وبنين
.......... تاجد أعمالك توديك النجاه

في نهار ٍ يحشر الخلق اجمعين
.......... تكشف الأعمال والعالم عراه

والسعيد اللي معه تقوى ودين
.......... في جنان الخلد حصل ما يباه

مع النبي والاولياء والصالحين
.......... جنة ٍ يلقى بها غاية مناه

ومن غفل ومطاوع إبليس اللعين
.......... في جهنم جمرها الصالي شواه

والندامه ما تفيد النادمين
.......... رفعت الأقلام وكل ٍ له جزاه

أما في الجنات ضمن الفايزين
.......... وألا بالنيران ميراد العصاه

ويالله ارحمنا ترانا تايبين
.......... يا كريم ٍ ما يخيب من دعاه

مالوم عيني ليا صدت عن اللاشي
.......... اللاش محد ٍ يباه ولا يبا قربه

حلفت ما أجيه لو إيحط لي حاشي
.......... ولو كان يمه حداني الوقت والغربه

عساه باللي يلوعونه برشاشي
.......... مالي ومال الدنوع اللي غوى دربه

شفي مع اللي لهم بالطيب مطراشي
.......... كسّابة النعم لين النعم تشهر به

بعض العرب يستاهل المدح مدبول
.......... والبعض الآخر مدحتك له مذمه

ما يقدر الأمداح جاهل ومهبول
.......... وبكرة على راسه يجيب المطمه

يستاهله رجل ٍ له أذكار وافعول
.......... اللي رقى بالطيب في راس قمه

أبيات موجهه لأبو فياض :: بندر بن سلطان بن شرار بن مهرس ::

سلام ردية وفاء يابو فيّاض
.......... مضمونها التقدير والاحترامي

يا عين حر ٍ للمطاليع نهّاض
.......... طلعه بعيد وماكر الحر زامي

سلايل اشيوخ ٍ لهم نور نوّاض
.......... قوايد الهيجاء نهار الزحامي

والطيب ما نستغربه منك لا ناض
.......... حيثك مقر الطيب يابن الكرامي