وش سالفة سبع القبائل؟!

السلام عليكم ورحمة الله وبركاته

وشلونكم يالربع

الكل سمع بسبع القبايل
وحبيت افتح موضوع يتناقش بهالنقطه

فيه سالفه تقول ان سبع القبايل هي القبايل التي حاربت علوى بكون لبن بالصمان

وهي :

1_ قبيلة المنتفق
2_ قبيلة العجمان
3_ قبيلة سبيع
4_ قبيلة المره
5_ قبيلة المناصير
6_ قبيلة السهول
7_ قبيلة الهواجر
8_ قبيلة العوازم
هاذا من غير الحضر الي مع الشيخ مبارك والملك عبد العزيز

______________________________________________

وقول اخر ان هي سبع قبايل ضد العوازم لوحده
1_ قبيلة العجمان ومعها يام
2_ قبيلة مطير
3_ قبيلة العتبان
4_ قبيلة العنوز
5_ قبيلة الظفير
6_ قبيلة الرشايده
7_وقبيلة شمر
كل هذه القبائل أجتمعت لتغزو قبيلة العوازم
ولاكن بقوة العوازم وشجاعتهم تم الانتصار على جميع القبايل التي ذكرتها
ولهذا سميت بسبع البيارق
واقراء هذه القصيده:

للشاعر : مساعد القفيدي العازمي رحمة الله عليه في معركة رضى عام 1929م

يالله ياللي مـا نبـي غــيرك مـدد ياللـي بك العبـد الموحد يستعــين =يارافــع الرايـات في بــر وبلـد انـك تعاونا على اللــي بايريــن
جـونا على غـره وجيناهـم هــدد واللي حضـر منا كفى اللي غايبـين =يـوم ارعـد الرعاد وانهـل الــبرد جـا موسـم يرخص اعمار المستحين
أهـل البيـارق طرحوهـم بالعمــد في شـوبة الـدخان قـدم الهايشـين =يــا لابتي مايودع الشايـب ولــد ياكـود فعل قـدم وجـه الطيبــين
ماينطـح العايـل ويخلفـه الوعــد إلا مبيعــة العـمـار الصاملــين =في ساعـة ماأحـد يخليها لأحـــد ياكود ضـرب يودع القاسي يلــين
ليتـك حضـرت وشفت يا شيخ البلد يوم التقينـا في شمــالي القطـيين =يـوم إن ابن جامع على الشوبة ورد سبـل وسبلـنـا عليهـم زاهديـن
يالعـن أبـو عند المعقل من شـرد وش يبي بالعمر لاسهـج القطيــين =لــوإن حلتنا خذاها مـن جــرد ماهيب معانا مـن عصور الأولـين
حضـاية للســوء لــين انه برد ليـن الطريح يطيح والطيـب يبـين =هــذا لهـم منـا وقافيهـم بعـد دولـة هل العـوجا كعـام العايلـين

واقراء هذه القصيده:

للشاعر :سعود الصقلاوي رحمة الله عليه في معركة نقير عام1929م.

هيض القصاد فعل العوازم يـوم صــار يــوم واق النايفة هيضـه مرقابها =يا مخيـل هل وبلـه شمـال واستــدار فيـه برد للمناعير يـوم لعابهــا
رشه البارود تمطر به الشـرف القصـار وأم خمس موسعة باللقا مضـرابهـا =ويوم راعي البيرق أردف من البيرق ونار شايف له عندنا شيفتن يدعى بهــا
لابتي لاجـا الملاقى يبيعـون العمــار مثل بياع الجلايب على قصابــها =هيه يا الطرشـان ياللي تـودون الخبـار فوق حيل ضمرن منتـوي ركابـها
علموا بفعولنـا واهـرجوا هرج القرار لـيا لفيتوا ديرة الغرب يا جيابهـا =كم هنوف من بني ملبسهـا حـمار تلبس الثوب الغبر عقـب زين ثيابها
يالإمام احلم ترى الليل يقفـاه النهـار والسيوف الصافية لاتهد انصابـها =محتمـين الدار يوم فيـه بـار يوم كل بار بالدار ما بـرنابــها

الموضوع قابل للنقاش

فمان الله

مشكور اخوي عبدالله الشدادي ودائما مبدع ورائع 0 تحياتي

		المشاركة الأصلية بواسطة : الهادي اقتباس
	مشكور اخوي عبدالله الشدادي ودائما مبدع ورائع 0 تحياتي

هذي مجرد اقاويل يالهادي بس من يعرف الحقيقه الله واعلم

مشكور على المرور

انا اعتقد ان ماخانتني الذاكرة ان السبع قبايل ....الي هي مناخ الرضيمة
سبيع ومطير والدواسر والعجمان والسهول وابن عريعر

أسباب المعركة

أن ماجد بن عريعر حرّم على الناس أكل (بيض الحباري ) وفي هذه الأثناء جاء

عشرة رجال من قبيلة العجمان في سفرة عابره ومعهم من لاينتمي لقبيلتهم

وآثروا تناول بيض الحباري حين وجدوه وتابعوا طريقهم وشاءت الصدفه أن

مروا الشيخ //ماجد العريعر وباتوا عنده تلك الليله وغلب على مرافقهم طبعه

السيء وأخبر سرآ ماجد العريعر عما فعله رفاق دربه (حيث أنه وضع جائزه

للذي يخبره عن أي أحد لايطبق الأوامر ) وحتى تخشى الناس سطوته وتأخذ

تحذيره محمل الجد قتل التسعه وشد وثاق العاشر حتى يمكنه من الهرب

لينتشر الخبر في الأرجاء فقال أحدهم بعد قتل التسعه ,,,

ركبن من العجمان ربي رمى بهم =مثل الجلب صكوا عليه القصاصيب ..

وأنتظرت قبيلة العجمان لأخذ الثأر وجاءت الفرصه سانحه عندما تفرغت قبيلة

مطير من حرب ( كير , والعمار , المربع ) وطلبت المساعده من الدويش فتم ذلك

ويقال أن شيخ العجمان في تلك الفتره هو ( جريس بن جلبان ) الذي كان قد

سجنه (بن عريعر ) في وقت سابق وأستنجد ب (العوباء ) زوجة ماجد وقال

قصيده بها منها هذا البيت :::

يا سيدة الخفرات ماتفزعيلي = أنا ستركن يوم الغداف تطيـر ,,

واستفزع شيخ العجمان واظنه حين ذاك حزام بن حثلين بعدد من القبائل لنصرته ضد بن عريعر
وفيها يقول شاعرهم

رحنا وجينا بالسهول وخلطهم =برازات عند الضيق تدمي حرابها
ورحنا وجينا بالدواسر الااد زايد= قوم تردجى بالاشده ركابها
ورحنا وجينا بالدويش المسمى = له هدة عند الضحى ينحكا بها
من يوم جانا وابلهم ساهجينها =اخذنا معقلها واخذنا ركابها
جاان بقوم يرهب الضد شوفها = وخيل تهاذب ماعرفنا حسابها

وكان مع ابن عريعر سبيع وعنزه وليس كل القبيلتين بل بعضهم فمعه ابن هذال وبعضا من سبيع
اشترط بن قويد الدوسري على العجمان ان له الريشه وهي رايه الحرب لابن عرير
( وحدثني من اثق به من الدواسر انها لازالت عند مران بن قويد الى الان ) واشترط الدويش الصمان والدهناء والهارج والمارج وودايع بن عريعر
اما الهارج فهو العبد الآبق وكسب الغنايم والمارج الفرس التي يقتل فارسها ولايعرف قاتله
ووافق العجمان على ذلك


استمرت المعركه عده اشهر غدو ورواح وقتل فيها مغيليث الهذال وبعد انتهاء المعركه وهزيمه بن عريعر نزل الدويش اللهابه ونزل ابنه محمد القرعا
ونزل بن لامي اللصافه
واخذت الودايع ابل بن عريعر اخذها الدويش

كان حباب من ادهى مطير وفرسانهم المعدودين
ارادبرغش بن عريعر لا اصحابه برصد

كمين لحباب لتخلص منه لعلمه بنقصه الشديد على قبيلة مطير

اذا ما قتل حباب. وكان حباب ينادي بالمعركه بسم ابنته حيث

لم يرزق بأبناء وكانت تدعى رفعا فبرغم من انتصار قبيلة مطير

بمعركة الرضيمه الى ان ابن عريعر استطاع قتل حباب

ويقول الشاعر:

اشوفها تاخذ علينا شهرها =غدت ببورفعه على حول مشعان

والعذر والسموحة ؟...


من قصص الرضيمة ..

أنقسمت قبيلة (سبيع ) على نفسها قبل بدء المعركه ولكن الغالبيه العظمى من القبيلة رجحت الأشتراك بالمعركة ..
وقد كان الشاعر (نوّال بن مخشوش ) من المعارضين لها وقد سخر منه أحدهم
لمعارضته تلك فكتم غيظه وأنتظر النتائج التي جاءت لصالحه والحمد لله ..

فقال :::

ولوّا سبيع التمر ما حدكم لوم = ولا حدّكم غرس يفجّر غذاها
طحتم بنار صلوها يطرح الحوم = والضبعه العرجا تعشي جراها
زوكم الشري المربرب على الصوم = وعيونكم بالشـب جوّد دواها

حنا مطير اليا حضرنا حضر نوح =عاداتنا غدى بها من حضرها

مشكوره يالمستحيله هذي من بعض السوالف عن

قصة سبع القبائل وفي انتظار البقيه

مشكورأخوي عبدالله الشدادي
علي هذه القصص ولكن ليس لدي أدنى فكره
عن هذا الموضوع بضبط وأتمنى من البقيه المشاركه اذا كان لديهم
مايعرفونه عن هذه القصص

الاخوه الكرام : مقولة سبع القبايل اطلقت على القبائل التي حكمة نجد
وهي : عنزه .. مطير .. عتيبه ..حرب ..قحطان..شمر..سبيع
مع أحترامي لبقية القبائل هذه اشهر القبائل التي كان لها فعول في نجد
ولاعلاقه للمسمى في أكوان او مغازي ..

مع تقديري للجميع

		المشاركة الأصلية بواسطة : عــذب الكــلام اقتباس
	مشكورأخوي عبدالله الشدادي علي هذه القصص ولكن ليس لدي أدنى فكره عن هذا الموضوع بضبط وأتمنى من البقيه المشاركه اذا كان لديهم مايعرفونه عن هذه القصص

يكفي مرورك الراااائع

مشكورين على المجهود لكن ماهي السالفه الصحيحة لتكتمل الصورة

		المشاركة الأصلية بواسطة : الولهان اقتباس
	الاخوه الكرام : مقولة سبع القبايل اطلقت على القبائل التي حكمة نجد وهي : عنزه .. مطير .. عتيبه ..حرب ..قحطان..شمر..سبيع مع أحترامي لبقية القبائل هذه اشهر القبائل التي كان لها فعول في نجد ولاعلاقه للمسمى في أكوان او مغازي .. مع تقديري للجميع

نشكر الولهان على

التعليق الجيد