صفحة الشاعر / بسيس بن حديّد الشدادي رحمه الله

البارحـه دقـت علـي الهنـاديـب=وجلست بين الاخـذ والـرد ساعـه
نويت اروح لي طـروش ومناديـب=وتعذرو وهم مـن ادنـا الجماعـه
ماقـدرو شايـب ولاقـدرو شيـب=قصايـدي ماوصلـوهـا الاذاعــه
مانعلـم الدنيـا ولا نعلـم الغـيـب=ولا همنا وسم الجمـل فـي كراعـه
يالله تصبرنا ولا في الصبـر عيـب=صبر الرضيع اليا انفطم من رضاعه
الام ماتـت عنـه وافريـة الجيـب=والطفل عيا عن حليـب الصناعـه
ياعدنـا ياللـي عـذي المشاريـب=اليـوم مابيـن الرجـا وانقطاعـه
كلن شرب وارتاح حتـى الاجانيـب=وداعـه اللـي يعرفـون الوداعـه
ام العيـون الساهـره والمغاريـب=وش ذنبـهـا ماتستلمهاالـزراعـه
ياعـد يامدهـال عـوج العراقيـب=عقب الروا قامـت تعـاوا سباعـه
ياللي معك فـي ماذكرنـاه تكذيـب=تعلـمـوا زهــران ولا رفـاعـه
لا تبتلونـا يالذيـاب المصـاويـب=اسبـاع لكـن ما تعـرف السباعـه
اشكي على الطيب ومن يعرف الطيب=اشكي وابـا مخلـد ينفـذ ذراعـه
يا مخلد انت امير ضمن المناصيـب=صلح خراب اسمار واقصـر نزاعـه
عـدو عليهـا قاطعيـن العراقيـب=لو كان مخذو من وراهـا طماعـه
المعتـدي مالـه ورانـا مطاليـب=اللي ولد عمـه اليـا غـاب باعـه
يامير لك جنحان صقـر ومخاليـب=تشفعـوا والـرب فيـه الشفـاعـه
هذا خطـا ما فيـه شـك ولا ريـب=مطـوع وينـه وويـن الطواعـه
الصبح في ايام الضمـا والواهيـب=ياللي هبطت السوق وين البضاعـه
يا معتـدي ياشيـن والله تعاجـيب=ما هي رجوله ذي ساعـه وضاعـه

اليوم بعد العصر في شهر شعبان=سمعت لي علم يصحي الرقودي
غافل وذكرني عبيد ابن سلطان=وقدح ضميري مثل قدح الزنودي
نويت اسوي لي من الشعر ديوان=وامشي مع الطيب واحب الردودي
ياعبيد كان انك مورد وبطران=الناس قبلك راسمين الحدودي
حنا ترانا في اول الهجر جيران=اقرب من اللي يحسبون الجدودي
ياعبيد تطري الشوف والشوف نقصان=مثل الشباب اللي مضى مايعودي
ان كان تبغانا ندور بالاحسان=وامشي معك ياعبيد لبو سعودي
واليا حصل من حط حنا وريحان=يصير نجمك مثل نجم السعودي
زين لها في الحي فله وبستان=وارتح وخل الخيمه ام العمودي
وان كان ضاع الجاه والحظ تعبان=منت على عوج العصي محدودي
ياعبيد ابن سلطان منته بفقران=عندك زهور الورد في كل عودي
واسلم وسلم لي على العم شامان=حب العرب ينقص وحبه يزودي
كم واحد بيته من الخير مليان=ويلفلفه مثل العقاب الحسودي
من يشتكي من حب سحاب الاردان=ماله ومال مبيحات السدودي
ومن يتبع المقفي على غير صفطان=مثل الصلاه اللي بليا سجودي
ياعبيد من يكتب قصايدك سودان=وقصايدي كتب الشباب الاسودي
ياللي توصف داعج العين غلطان=حيرتني مدري من اي البدودي
يومن لك في ناعم العود غرضان=وراك ماتعجل علاها الردودي
ماحطت الفرشه على بيض الاسنان=ولا ربطت في الراس مثل الورودي
ولاسيرت بين العرب مالها شان=ولاخذت عشاها من تميس الهنودي
ماقالت اشرو لي مسجل وشرطان=ولاطالعوا فيها وجيه القرودي
ولاتستمع في كل مطرب وفنان=ولاحط حمالات فوق النهودي
اديارنا منه اليا بطن سلوان=عقب النبات الزين راحت ضمودي
وراع البداوه صار ماهوب رغبان=وان جا يقود رعيته ماتقودي
واللي معه معزا وقطعه من الضان=واهل الديانه في طرفها قعودي
واصبر كما صبر ابن عمي سليمان=لو كان بعض الصبر ماله حدودي
ليته يخاويني لغامد وزهران=يومن بعض الناس مافيه فودي
واصبح غناوي عقب ضليت فقران=وارتاح عقب ملاوعات البرودي
مثايل تطرب لها اشكال والوان=هاذي نصدرها وهاذي ورودي
هذا وصل الله على نسل عدنان=عد النبات وعد وبل الرعودي

الله يامحلاك يافرحة العيد=ياحلوها بين الاهل والقرابه
محلا تهاني العيد بين الاجاويد=وكلن يواجه ماعمل في كتابه
يامرحبا ياجار مليون ويزيد=جار ورفيق وبابنا عند بابه
الجار له حقين سنه وتاكيد=وصى على الجار النبي والصحابه
قلبي يهددني على الشعر تهديد=تقول ديان يدور حسابه
ديان حق وناخذه بالمواعيد=واليا زعل ماجابت الورق جابه
الناس تبني بيوتها بالتقاصيد=ومبنى يجي طيب ومبنى خرابه
وولد يسمى من خيار الاواليد=ماخيب الله والده يوم جابه
وولد يبا صيده ولاجاب له صيد=وولد تحده عن عشاه الذيابه
وولد يجي مثل السمانا الملابيد=وولد حفظ مستقبله في شبابه
والشعر جاله في ضميري تراديد=لولا ضروفي كان ماقلت جابه
وعلى النبي مني صلاة وتشاهيد=عداد ماهل المطر من سحابه

هذه القصيدة للشاعر بسيس بن سفر بن حديّد الشدادي رحمه الله موجهها لأبو فوزي عيد بن مسلط الشدادي:

الله على صالون شد الوكاله = راعيه جابه عن طريق الأمارات
وإن ركبه السوّاق ميّل عقاله = وفي داخل البيبان ريح الخواجات
سواقه اللي ضاري ٍ بالشكاله = يمشي بأدب ما كسّره بالمطبات
ومن يشتري الصالون يرتاح باله= ماهوب مثل الددسن أم الحنيات
يا عبيد بن سلطان ود الرساله = حتى تسلمها مدير الجوازات
عطه الكتاب وقلنا كيف حاله = ومني لأبو فوزي سلام وتحيات
الشاعر اللي ما ندوّر بداله = هديته من عندنا عشرة أبيات
كم من سجين ٍ يطلقه بالكفاله = يشهد له الله ما يبا له شهادات
سلم ديه لعجير من حر ماله = وأطلق سراح ابنه وصارت سلامات
يوم ان بعض الناس تقصر حباله = حبال أبو فوزي جداد وطويلات
سعد الرفيق أليا عناله وجاله = قول ٍ على فعل ٍ وماهي خرافات
نعم ٍ بأبوه ومتعبينه خواله = ماهوب خبل ٍ ضاري ٍ بالتلفات
ومن لا تجمل حي عزي لحاله = ولا عاد ابا نفعت رفيقي ليا مات
واللاش ما تعطي يمينه شماله = وأليا لفاه الضيف ما يذبح الشات
ونبا الغداء في الطلحه أم الظلاله = اللي ورى قهوة محمد وصنات
ونذبح طلي ونحط نصه فواله = والعصر تاخذ لك مع البدو جولات
والبارحة في الليل سجلت حاله = حاله تجي وتروح في بعض الاوقات
يا عيد أنا شايب وابا لي زماله = ودي بها واللي على البال ما جات
ان رحت للدلال يبغا دلاله = وان جيت راع المال يبغا قريشات
وتغرنا يا عيد بعض الزواله = وغالي الثمن ما ناجده في البقالات
والناس مدّاحه لمن زان فاله = ومن شان فاله عرضوه التشمات
وصلاة ربي عد منشاء خياله = وعد الحجيج اللي وقف في عرفات
على النبي اللي مشى بالعداله = راع الشفاعة عند رب السماوات

يــابــو نــمــر قــلــي تـكـلــم ومـسـمــوح=وعسـى السعـد فـي المقبـلات الجـدادي
نـويـت اشــارك بالـشـعـر كـــل مـمــدوح=وانــا مـــن اول فـــي حـيـاتـي حـيــادي
والشـعـر مـثــل الـــزاد لاصـــار مـمـلـوح=وزادٍ بـلــيــا مــلـــح مــــــا هــــــوب زادي
وقلـبـي يـابـن شــلاح مـغـرم ومـجـروح=بـــدا عـلـيــه اسـهـيــل وقــريــن حــــادي
وارسـلـت لــك قصـايـدٍ تـنـعـش الـــروح=والـطـيـب عـــود وريـــح عـنـبـر وكـــادي
وان شفت في المجلس سواليف ومزوح=هـــــذاه مـطـلـوبــي وغـــايـــة مــــــرادي
قلتـه وانــا عــن تـبـع الانــذال منـصـوح=راع الـنـمـيـمــه والـهــبــيــل الـــربــــادي
وان كان ابـو ماجـد صديقـه مـن الـروح=الـحـلـقــه الاولــــــى نــبــاهــا تـــعـــادي
وانـا مـع اهـل الـعـرف طـمـاع مشـفـوح=ابغـى قصيـدي ينسـمـع فــي الــروادي
امـــا تطـوعـنـا مـــع الـجـيــش ونــــروح=والا كتـبـنـا فـــي الـحــرس والـجـهـادي
مـاودنـا نجـلـس عـلــى غـيــر مـصـلـوح=واشـــره عـلــى رجـــلٍ يـحــب الـرقــادي
وان جــا نـهـارٍ فـيــه طـــارح ومـطــروح=نمـشـي تـحـت خـدمـة زعـيــم الـبــلادي
وبــلادنـــا مــادارهـــا كـــــل مــفــضــوح=حـامـيـنــهــا بــالــجـــد والاجــتـــهـــادي
عـدونـا ثـوبــه عـلــى الـســاق مـشـلـوح=وارضــه رعــى فيـهـا الـدبـا والـجـرادي