أنا ما ذبحني غير يوم العشي مريت = مداهيل حي ٍ بالمودة مصافيني
وياليتني ما جيت مدهالهم ياليت = تذكرت وقت ٍ فات واسترسلت عيني
لقيت الديار اخلي ومن شوفها انضريت = ماغير الحمام يجر فيها التلاحيني
سقى الله زمان ٍ يوم ألاقيه لامن جيت = وانادي على خلي وخلي يناديني
لكن الليالي شتت شملنا تشتيت = تنحا وأنا عنه تنحت بي اسنيني
وانا يعلم الله ما نسيته ولا سجيت = وعليه الغرام وزايد الشوق طاويني
ولامن ذكرت الترف ضاف الهدب ونيت = ونين الطريح اللي ضرب له برمحيني
تكالت عليه الخيل ولا فاده التصويت = وخلوه ربعه في نحور المغليني
وأنا لا سمعت احد ٍ يطرّي الغضي فزيت = احبه واحب اللي يطريّه بالزيني
غرامه برى حالي وجرّعني الحلتيت = ومن سبته شفت العناء والتغابيني
ولامن غفت عين المخاليق ما غفيت = تقول الملايل تلتهب في حجر عيني
حداني الزمن عن صاحب ٍ في هواه ارهيت = ولا لي رفيق ٍ في زماني يشكويني