عزي لمن مثلي مع الوقت مطواع= ذله زمانه وبتلته الهواني
ماله خوان ولا بني عم نفاع= كنه جريم تحت ملقي البياني
له فالحشى خمسه وعشرين مرقاع= تليمة من فوق حدب المحاني
يدفع ثمنها دوم بالمد والصاع= ولها على ماصار شاهد عياني
يامل قلب بين الآضلاع ينزاع= زوع السفن من فوق شط المواني
ياما زمان فات عشيت مناع= وقلت الله يحييك يامودماني
لكن طبع النذل للخبث تباع= من بين خلق الله صار امتحاني
علمته من العام للرمي مقلاع= ويوم اقتوى جنبيه عود رماني
رجال ذكره بين الأجواد ماضاع= صيته سوات المسك والزعفراني
ورجال ماله مع هل العرف ميقاع= مايعرفه غير المره والعواني
ياعل قلب ماعرف درب الاسناع= يفنها من جور الصواديف فاني
وياعل رجلاً لسواليف سماع= ماله مع الاجواد عيش ومكاني
يامل قلب في هوى ريم منصاع= ون جيت اعذله عن طريقه عصاني
كم ليلة من حبها قمت مرتاع= وخشى الزمان الي عليها حداني
ياما نهيته لكن القلب ماطاع= ساعة تمره يرتبك في ثواني
واقول لله العجب في هذا الساع= ويش الذي سويت بي يازماني
لو للقلوب اسواق اصبحت بياع= وبيع قلبي وشتري قلب ثاني