يامن يودّي من محب سـلامــه= وتحيّة ممزوجة بالمــلامـــة
على حبيب صدّ عنّي علامـــه؟= هو مجنف أو هو على العهد مازام
سعت بحكي الزور ملعونة الشّيب= بيني وبين صويحبي فايح الجيـب
طلبت أنا اللي يعلم السر والغيـب= يجعل أشات العجز توخذ بالأقـدام
من هجر من لاعنه أقوى امتناعي= وأوجس على كبدي رصاص يماعي
وأصبحت لا نيم ولاني بواعــي= بين الخليل وبين زلاف الأيـــام
يازين تنسى يوم أنا وأنت بالغـي ؟ =ومعاهده ويّاك في مكسر العـــيّ
إن كان مستجلي لغيري من الحـي= لامي عليك أبعد من الهند والشــام
لا والذي يعلم مخاريج الأنفــاس =كان إنت مستجلي لغيري من النـاس
لأقطع مقاديم الرجا منك باليــاس= وانقض عهود الحب من عقب الابرام
يامن عليه من الجوازي تــهايـا= قــم بالرضا ياجـوهري الثـنايـا
مادام في قلبــي لحـبك بقـايـا =وإلا تراى لسلّم الوصل كصّـــام
يامن كما يداربه الصّبـح خــدّه= علــيّ ماقبــلي حد بـاح سـده
إلا ولامـثـلك بـدار المـــودة= مثـلك جلس عنده خلـيله ولا قـام
غديت وأغـوتك العـلوم الرديــة= وخـدمت لـك كنّـك حدا والديّـه
واليـوم ياغـادي الجـدا برت فيّـه= غـاد جداك وبعت لامـاك بفصام
أودعتني شّـروا الدلّـي الذّبــاذب =لابين ميّـــاح ولابين جــاذب
ياما تواعدني تجي وأنت كـــاذب =والكـذب مذموم براعيه نجّـــام
واللـه ياسـلطان خمـص المكـالي= ولو ضحـك سنك وزان الحكى لي
لو باعني مّـدّيت حبـل الرجـا لـي= إنّي بنـوّك عارف به من العــام
أراك ياغــادي الجـدا والعنــايه =أجـزيك بالحسنى وتجـزي بسايـه
أحســبك ماتـتبع هوا إلا هــوايه= ولا تغيّــرك الليــالي والأيّــام