صفّت القيفان قدمي صف طاعة=صفة العسكر لوزير الدفاعي
وانـتـقـيـت خيارها في ربع ساعه=مثل من يختار له صفراً رباعي
والمعاني عشقها لي باندفاعي=كني ادعيها باشاره من صباعي
عاشـقـتــني عشق من سن الرضاعه=لو ما ادعيها تجي من دون داعي
جت لأهل بيت ٍ وسيعات ٍ رباعه=ناصبينه وسط ريضانٍ وساعي
شيده سلطان في فن وبراعه=ومن بذل به جهد مشكور المساعي
بيت عزٍ جمَّع اعيان الجماعه=ماتفرق صفهم عقب اجتماعي
مكرمين الضيف في يوم المجاعة=فرقهم عن غيرهم مليون باعي
والضيوف اهل الكرم واهل الشجاعه=هُـمـَّـه اهل البيت وآمرهم مطاعي
واشكر الزاير على حسن استماعه=واشكر السامع لحسن الاستماعي