ياهاجسي هات جوهر معاليك=من موج بحرك وجزره ومده
ابيات من عذب الاشعار تشعيك=في قاف باسما المعاني امده
وياذاكر الله عسى الرب يهديك=ويزيد بالقلب عزم ويشده
ماللعقد غير حل الشرابيك=يبدا سراها بعقده وعقده
ابدا بتصحيحها قبل تنهيك=وفق الضوابط وحسب الاجنده
بنيت من هاجسي برج تمليك=به شمّخ بيض تزداد جده
وان بعض الاثمان يصرف بها شيك=لو سيق به بنك ماكان سده
مبني بلا ربط من دون تفكيك=منظوم حدّه على حد حدّه
ولاتاصل الكهربه دون تسليك=واحترت كم سلك يحتاج امده
وياحبذا والاضاءه تماتيك=تجلي دجى الليله المستبده
عل ّ وعسى لمعة الطيف تعطيك=طيف الف سفتي على الف تنده
وبديت وانهيت دقه وتشييك=ولاح السنا يجهر العين مده
يبرق بعزّ الضحى نوض يعشيك=يلوي شعاع النظر في مردّه
ذيب الغداري صعيب المفاليك=يعوي وصلفات الايام ضده
لا من سرى في دجى الليل يشفيك=واليا غفى ماينوش المخده
عجل الخطا في عسير المداريك=واتخيل قدح الشراره بزنده
يبدا بخطوه ويمشي بتكتيك=يطوي صحاصيحها المجرهده
في وقت من صالي القيض يكويك=او ترتجف من هبوبه وبرده
صبرك وماجاك ماكان مخطيك=تشيد مبناك والا تهده
لو تعمر الدهر مااضن يكفيك=الوقت يمضي والاجال مده
ويسعد صباحك وطابت لياليك=اقدم وباب الرجا لا تسده
ولاغير رب البرايا يناجيك=والله له الفضل مااحد بنده
ويامرحبابك وطالت مهاليك=مير الزم الحمل واعزم وشده
عسى هماليل الامزان تنشيك=بمروج خضر وذعاذيع رنده
وابيات خيل القوافي توافيك =صف وطوابيرها مستعده
بعقود فل وتحايا وتبريك=وقطعة حلا بين ورده وورده
وتنصاك صفر الدلال وتباريك=عز وكرامه وقدر وموده
ويجيك من هو يعزك ويغليك=في قرّه العين ماعنه صدّه
كن الغلا معطره من حواليك=لا اقبل نسيم الهوى فاح ندّه