إن جادت الدنيا بصاحب هلا به=وإن راحت الدنيا بصاحب فداها
وحق السؤال اللي فراسي جوابه=يبشر بها وارقى على مستواها
كل الوجيه اليوم صارت تشابه=ما تختلف للمحتزي لا حزاها
يقوله اللي داب الأيام دابه=وكيف خياراته بعد ما قراها
عن الخطأ دل الطريق وصوابه=ومن القدى مد القدى لا وفاها
ما عاد فالدنيا حقيقي غرابة=لا خابت الهقوى على من هقاها
الرجل لا عايش من أول شبابه=متاعب الدنيا عرف مقتضاها
يعرف مساراته ويحسب حسابه=ويغنيه فال الطيبة عن قفاها
دنياك لو سدت جناح الذبابة=ما كانت الخيبة على من رجاها
دنيا مصالح تفتقدها الذرابة=اصلح وصالح ما تجنب عداها
ريال يفقدها مقام المهابة=وريال بامكانه يبيع اشتراها
اقل ما فيها يزيدك كآبة=وأخير ما فيها بزيد بغثاها
والسيف أبو حدين داخل جرابه=والغانمة ما تنقص اللي رعاها
وأن بخلت الدنيا بصاحب محابه=هذي عوايدها وذلك كفاها