بديت بأسم الله رب البريه =اللي رفع سبع وبسطها سويه
سبحانه اللي عالم ٍ بالخفيه = بأسمه بدينا في القصايد والأبيات
ومن بعد ذكره يوم جاء لي مجالي= نويت أسوق القاف يوم أستوى لي
في مدح ربع ٍ يعشقون المعالي = وفي مدح ربعي ما لحقني ملامات
أحبهم والله حب ٍ بلا قيس = ولا أرضى عليهم بالخطا والحواسيس
مهوب قول اللي هروجه تماليس = قول ٍ ليا قلناه يطلع له اثبات
ربعي بني شداد قوم الشكاله = سلالة ٍ يا طيبها من سلاله
ونويت بأمدح كل خامس لحاله = يستاهلون المدح في كل الأوقات
الاد مهرس هم شيوخ القبيله =أهل النقاء وأهل السيوف الصقيله
شيوخ ٍ يقودون الجموع المهيله = يوم أن كل ٍ له بارق ورايات
والاد عواض الرجال المناعير = أهل الشجاعة محتمين المظاهير
وشعّارنا وأن عوّدت للشواعير = قول وفعل ماهوب كذب وخرافات
والاد بديوي ملحقين المخلين = كسابة الناموس في الكود واللين
وفعولهم معروفة ٍ في الميادين = وألهم على لطم المعادين عادات
والاد زايد يا ذرا كل مضهود = أهل الوفاء والطيب والعز والجود
يشهد عليّ الله والعالم شهود = بفعولهم يرقون روس الطويلات
والاد البصيصي واردين المنايا = يا ظفرهم يوم أعتقاب الهوايا
شجعان في الميدان سووا سوايا = يوم أدبرن ذلي وذلي مغيرات
والاد عبدالله ذياب الغداري= زبن الدخيل اللي جراله جواري
وبالطيب والله يفحمون المباري = أهل الفعول الطيبة والشهيرات
والاد حجري طيبين المبادي = ربع ٍ بكاس المر تسقي الأعادي
حماية الساقه نهار الطرادي = وأخذوا على طيب الفعايل شهادات
والاد القصيّر يا وساع الطعوني = ميقافهم في الضيق يبري الغبوني
ماهم من اللي في اللقاء يرجعوني = وأهل السيوف الساطيات الرهيفات
والاد روق مروّقين العفاريت = كسابة القالات والمدح والصيت
وفعولهم يدري بها الحي والميت = مثل الجبال الشامخات الزبينات
والاد مرمش كاسبين المدايح = يوم أشهب البارود جاء له روايح
والدم من ضرب المراهيف سايح = عاداتهم كسب الثناء والجميلات
ذولا بني شداد عشرة خوامس = صديقهم ما جاه من الضيم لامس
وعدوّهم كنه بوسط المحامس = وتبطي عيونه من المذلة سهيرات
والضيف لا جاهم لقاء له تهاليل = ودلال رسلان ٍ بها البن والهيل
كيف النشاما مع سمان ٍ من الحيل = والعود في المجلس يجيله سحابات
والجار ما يسمع من الهرج زله = ولا يلحقه في الوقت ضيم ومذله
وعند النوايب كلهم فزعة ٍ له =يقفون من دونه حصون ٍ منيعات
وأنا أدري أني مقصّر ٍ يا جماعة = في مدحكم يا أهل الكرم والشجاعة
مار أعذروني والمواقيف ساعة = وتستاهلون المدح في كل الأوقات
سموا بن الحارث رجال الصمايل = قبيلة ٍ عنها تحود القبايل
أهل الفعايل يوم وقت الفعايل = قوم ٍ لهم في قمة المجد طالات
وباقي القبايل ما عليهم قصيره = تشهد لهم بالطيب كل الجزيره
ألهم فعول ٍ في المواقف شهيره =والنعم والله أقولها عشر مرات
وختامها عداد وبل الغمامي = على النبي أفضل صلاة وسلامي
شفيعنا يوم الحشر والزحامي = المصطفى المختار سيد البريات