سلام الله سلامٍ فيه من وبل الخيال مزون=سلامٍ يسمعه قاصي سلامٍ يسمعه داني
سلامٍ قاله الغربي وغنى به وجر لحون=ونظمها قصيده وسطها لولو ومرجاني
وزنها ثم نسقها وغنى والعرب يووحون=وهوجس ثم فكر ثم طار بغير جنحاني
خطف سمع الاذاني ثم عميت من بعده عيون=وقطع عرق الوريد وداس له مليون شيطاني
تحتزم وانتخى والحمل شاله شيل فوق متون=تبسم ثم كشر ثم سل السيف شاماني
عدى بعده مشى بعده تريح في ظلال غصون=بكى بعده ضحك بعده مشى مع ناس عمياني
سهر ثم انقهر والعين ماتبصر بليا نون=سهرت وتعبت عيوني لكن النوم ما جاني
كفلت المنسجن واصبحت انا اللي في السجن مسجون=ماهو سجن الحكومه مير سجنٍ ياعرب ثاني
اكلم واتكلم واعرف الفرحان والمحزون=ابرمج ذاكره فكري وافرمتها بالالماني
اسولف مع جنوني والجنون تجننك بجنون=ولا ينجن لمن جن يصيبك جن وجناني
ليا منا ضحكنا حولنا كل العرب يبكون=وإذا منا بكينا كل واحد صار فرحاني
زمن معكوس والعالم مع الايام بيلفون=ويجي وقتٍ ماعاد تميز المجني من الجاني
انا اشوف العرب في وسط بيرٍ عمقها مليون=ومن كذب كلامي مستعد احط برهاني
بسولف وابدع القيفان لو ان الصدر مغبون=وابا اترجم كلام الفلسفه في وسط قيفاني
مدام ان الصدر ينزف وفي وسطه ثلاث طعون=بجر الصوت قبل اموت واترك باقي ازماني
انا ماودي اجرح كل قلبٍ في الزمن مفتون=ولكن العمر لو هو طول ياهل الوفاء فاني
وانا ماودي اغني وقدمي ناسٍ يصلون=ولو ان القصايد ياعرب في وسط ديواني
انا صاحي ولاني في زمان العولمه مجنون=ولكن الزمن هذا يابو نوره تحداني

وسلامتكم

تحياتي الغربي