يالله يا علام خافي وما ابديت = تفرج لنا يالله حان الاواني
وياليتني ما رحت للحفر ياليت = كثرت همومي وأبتلاني زماني
بغيت أمضي الوقت لكني أزريت = والصبر باح ولا بقى له مكاني
وأنا همومي كلها رجعت البيت = وإن شفت بابه زاد قلبي جناني
وإن جيت أنام بتالي الليل فزيت = وبقيت ساهر لين يبدي الأذاني
ولالا الحياء من ديرة هتيم هجيت = مربا الصلب والوقت فيها جفاني
ويا علي أنا من ديرة الحفر مليت = نبغا ديار مكرمين العواني
أكثر لك الترحيب لا منك ألفيت = وجاب الذبيحه من خيار السماني
ويا موتري فيك البواجي مع الزيت = غيرتها وأنته تعرف المعاني
نبغا لطيف الروح يمه تنويت = نبغا صغير السن صافي الثماني
وان ضاق صدري يم داره تمشيت = وأسمع جوابه يوم شفته دعاني
وياليتني مع قايد الجيش حجيت = قصدي نمر العود وألا الخواني
ويا أبو بدر وش بك مع البعد قفيت = لا تتصل ولا خطاب ٍ لفاني
وصلاة ربي عد من حج للبيت = على النبي عداد سوق السواني