لايابحر ياللي تغازلك الاشعار=واعذب طواريق الهوى والقصيدي
جيتك وانا تايه وضايق ومحتار=مااحدٍ جبرني يابحر جيت بيدي
ضاقت بي الدنيا على وسع الاقطار=واقبلت لك وانا مقيّد بقيدي
مثل الاسير اللي مكبل بلا دار=غريب دار وراس ماله حديدي
قيدني الهاجوس واسهجت الافكار=مالي ونيس الا الورق والنشيدي
جيتك بعد ماعسعس الليل زوار=وانته كريم ولا تمد الزهيدي
بيني وبينك يذبل الورد ويغار=انته نديمي فالحزون ونديدي
جوفك من الاحزان والهم مقدار=ماجوف صدري والسعاده تبيدي
ابوح لك باقسى المواجع والاسرار=وتبوح لي من صمتك المستبيدي
صدري يفور امن الليالي ولافار=الابعد يبّس خضار الجريدي
البرد يحداني على لاهب النار=والصبر ينقص في يدّي ويزيدي
ينقص ليا مني تذكرت ماصار=ويزيد لامن قلت بكره تهيدي
مرار مااحسب للمناقيد .. ومرار=احسب واعيد حساب عمري وازيدي
صرت آتفكر فالليالي والاقدار=واللي تمده للشقي والسعيدي
شفت البلا بين الملا صار يندار=كار الضعوف اللي تحب المكيدي
كثروا منقلة الحكي سر واجهار=بين العرب سواة ساع البريدي
ناسٍ بلا ذمه تروّج للاخبار=شيٍ وكاد وشيٍ آخر جحيدي
اهل النمايم مالهم فالعرب ثار=غير الحسد والتفرقه والوعيدي
علومهم فحلوقهم ذنب واوزار=عمله بلا بايع ولا مستفيدي
الله يكافيني من افكار الاشرار=والله يقديني على مايفيدي
اقولها واحشم طويلين الاعمار=اللي رفاقتهم غناه ورصيدي
درع وذرى للي عليه الزمن جار=لاكثرت القالات ضد الضديدي
هم محزمي وقت الشدايد والاخطار=سنايدي عن عرف زايد وزيدي
حطيت لاصحاب الرخا رمز وشعار=شعارهم رمزه مصالح وفيدي
صغيّرين الناهيه عور الاشوار=اللي لعل رقابهم للحصيدي
اشوم عنهم واتعذر بالاعذار=اللي تكفي سد باب النقيدي
لا يابحر باقي هواجيس كبار=والهم مع دمي جرى في وريدي
مالي مع الفرحه مواقف وتذكار=وش عاد ادوّر فالتعاسه واريدي
فقدت من ربعي مناعير واخيار=لا والله الا من بعدهم وحيدي
عشاقة العليا مشاهير الاذكار=سقم المعادي فالنهار الشديدي
ربعي بعيدين المطامع والانظار=بحيله وحال وسيفٍ املح جريدي
من عصر راس ذياب عساف الامهار=لفعولهم وسم وعمار وشهيدي
لاجيت اعدد في خصايلهم احتار=بين السطا والجود فكري شريدي
اذكر مهيّبة العدا سقم من جار=ولا اذكر مضرّين راس الهريدي
ولا اذكر اهل البير حماية الدار=سبعه وحدّوا من حداهم حديدي
يامدح عبّر للرياجيل معبار=واحصد معاريف النشاما حصيدي
مزبّنة من ضامه الويل والعار=امداحهم تملا البحور وتزيدي
من روس ابالحارث طويلين الاشبار=اللي لهم فالعز مجدٍ تليدي
تشهد قبايل نجد واطراف سنجار=وتشهد مغلقة النحور وتشيدي
يكفي ليا عديت مقبول وعجار=عون القريب وكحل عين البعيدي
لايابحر خلك على قلبي ستار=وحبل التواصل في هوانا مديدي
ماطعت بك قولت .. ترى البحر غدار=طبعي كذا فالعشق راسي عنيدي
شفني على شانك تمثلت الاشعار=واعذب طواريق الهوى والقصيدي