يا اللي عن أخباري أصحابي تنشدها=أنا ورى هقوت اللي يلتفت صوبي
لا تتبع راعي الفتنه وموقدها=كم واحدٍ راح سبة علم مكذوبي
قم خاوني قوم والأفعال شاهدها=وإستكشف إخصالي الحسنات وعيوبي
مالك ومال العلوم اللي ترددها=ناسٍ ضعوفن ليامن جيت طاروبي
ومالي ومال الكدوش اللي تلاجدها=مدام عقلي معي وأميز إدروبي
أعرف هالأشكال وأعرف وش مقاصدها=لو كان لاجيتهم فزو وحيوبي
من يفرح بزلتي ماهوب واجدها=أدرى مواجيب خلاقي وماجوبي
ومن فضل ربي وجيه الناس ما أعبدها=ولا تلبسة ثوب العز مقلوبي
أقول وأطول والنضرات مبعدها=ماني قريب مدى وأناظر إجنوبي
ولا آرد عدودٍ كثير الناس تاردها=أتعب على لقمتي وأشقى لمشروبي
إديارن أصبح بها وديارن أهجدها=والرزق عند الولي والأجل مكتوبي
مريت كل الدير وأعرف مساجدها=لأدى فريضه ماجيت أنفض إجيوبي
كرامتي غاليه والنفس أجاهدها=لو إن الأيام حطت دوبها ودوبي
من طاوع النفس والأرياء توسدها=ولا عاد تفرق معه غالب ومغلوبي
واللي يميز بصادرها وواردها=يبعد عن أهل الجرب لايصير مجروبي
وأهل الحكي ما يشرفني تواجدها=ولاني على رفقة الأنذال مغصوبي
أبرهن السالفه بالفعل وأسندها=إن جيت محسوب وإن قفيت محسوبي
هاذي علومي وأنا أخوك وتفقدها=والله يسامح خطاك ويغفر إذنوبي
واللي عظلاته اليا أقفيت يفردها=جداه لا أقفيت يتسلى بعرقوبي
خبلٍ لو أقرصه قرصه ما تعودها=لكن تحشيم راع الكلب عذروبي
لا ناقصن بالصفوف ولأهو زايدها=لكن عسى خالقه يصلحه ويتوبي
الجزله إبمثلها ياصاحبي زدها=وكان الوفاء مطلبك تراه مطلوبي
صعبٍ يهدم الصروح اللي مشيدها=ونور القمر ماهو إعن الناس محجوبي
الله يديم الوفاء وأهله يساعدها=ومن حبه الله من الأجواد محبوبي
تمت والأجداد ما أخالف عوايدها=ولا يمكن إن الزمان يغير إسلوبي