عمريةٍ جيناك من قلعة النيا= جينا على عشر الركاب ارداف
جينا مع زيزا حمادٍ متاهه= على صيّعرياتٍ صغار خفاف
شرف رقيبتنا بما بان قدمنا= وجانا معيفٍ هايله ما شاف
يقول قومٍ يرعب القلب كثرهم= للي يوقمهم ثلاث آلآف
غاروا علينا يوم شافوا قلنا= وردوا حيام وصدروا عيّاف
تهيا لنا في نقرة سنام دويسه= يشبع بها ذيبٍ جراه اضعاف
نقرة سنام لا سقاها وبل الحيا= ولا نزفت عقب الحقوق عذاف
يا كن تعالجنا ليا ضيقوبنا= معالج سباعٍ شاعهن اعلاف
ويا كن وقيد أرماحنا بأيماننا= سعيرة ضوء وسط غابة غاف
أبا أمدح علي وابن نومان هاجد= وحمد لنا في الضيق مثل اسناف
ذبح ثمانٍ قبل تبرك اركابنا= عسى تعدا عمره الأتلاف
حمد ومنصور ظفرانٍ في اللقا= ضياغمٍ في الهوش والا أشراف
والوائلي ناصر سراع عثايره= من بندقه ساق الحصان اشظاف
ويا نعم يا ولد الكبودي عامر= يستاهل اللي له ثمان ارهاف
الجادل اللي كالقراطيس خدها= وقرونها لا جاء الجليد إلحاف
وعبيد المنعور طعّان بالقنا= ما كنه إلآ بيننا وّقاف
أخذ بجران من الربع وشطره= حرٍ بدا في عالي المشراف
حيث إن بجرانٍ ليا ضيقوا بنا= له بندقٍ ما خانها الشّواف
تفافيقنا تغضي عن الحد والقناء = وهو ما تهزهز صامل الميقاف
بداح لا من هد بالسف والقنا = جعل لنا دون الطامعين سناف
بداحٍ وبجرانٍ صناديد لابه= عيال عمرٍ فعلهم ينشاف
واللي بقوا ما قلت عن وصف فعلهم= لهم من البيضاء ذراً ولحاف
حنا نطحنا المنتفق قوم ابن ثامر= ظفران ما صدوا لها محراف
يا كثرهم وإنّا على عشر حزّب= أحمدك يا منجي من الأصداف
نطحناهم بمخيراتٍ تنثر الدما= وعيال عمٍ فعلهم ينشاف
وخسّرناهم مايه وعشرين سابق= وتسعين رجلٍ كلهم عرّاف
بالوقم وإلا ما قدرنا نعدهم= في ساعة ضيق والأرياق انشاف
يا كن جثايا الخيل في ملعب النضاء= هشيم تذريه السيول ارداف
يا ضبعةٍ بالزور عرجاً برجلها= ترى لك بين الروضتين اجياف
كله لعينا حرةٍ من جيشنا= ظهرنا منها والوجيه انظاف
تسعين سيفٍ علقن في حقبهن= ومسلّلاتٍ ما بهن اغلاف
يا طارشٍ منا لا جيت ابن ثامر= يلبسهم عقب التّرام اغداف
حنا بني عمر سلالة عامر= قومٍ على الكايد ما هم بخفاف
هرج بلا فعل يقودك على الردى = والهرج عيب كان فيه خلاف
تمت وصلى الله على سيد البشر = اعداد ما حج الحجيج وطاف