وليا حمست إحرص على حمسة الحب=واعرف ترى الحمسه تبي وسع بالي
تاخذ على ادنى الجمر فتره تقلـب=لين العرق يطلع سـوات اللوالـي
ومن يوم يطلـع فالمبردلهـا كـب=لين الندار ان كـان فيهـا يشالـي
وليا خذت مقـدار للنجـر قـرب=ودنه بصوتٍ يسمعـه كـل غالـي
دنـه وخلـه للمساييـر يجـذب=لاقـام صوتـه للنشامـى يلالـي
يوحونـه الجيـران لاقـام يقنـب=ويجيك الاقصى والقصيـر الموالـي
وعقب تدق البـن لقـم وركـب=لين انها تسمـح مـن الاجتوالـي
وقبل تبهرها عـن النـار تجـذب=وتركد شويه لين يصفـى الحثالـي
وبرويد في حدى المباهيـر تسكـب=من عقب غال الهيل فيهـا يهالـي
واعـرف ليابهرتـهـا يالمشـب=بتراه يكفيهـا مـن النـار صالـي
ثم اجذها من يـوم بالهيـل تقلـب=ومن يوم تركـد صبهـا للرجالـي
حتى يجي الفنجال منهـا لياصـب=بين الشقار وبيـن لـون الشعالـي
ياأمّا أشقرٍ رايب مثل بول الارنـب=والا اشعـل يشبـه لـدم الغزالـي