يطري على البال من عذب الافكار=شعر ومشاعر وقدح وتفاكير
تلفي بريح الخزامى والازهار=وتصبحك او تمسيك بالخير
اهلا هلا ياتصاريف الاقدار=مرّي ولك عند شرواي تقدير
كان الغلا مايثمّن بالاسعار=وكان الذهب مايبدل بقصدير
اسرجت خيلي وطبّيت مضمار=بين الشبيبه وبين المغاوير
واخذ بي الوقت سجه ومشوار=صوله وجوله ومسعى وتضمير
واطلقت خيل المشاعر والاشعار=وقامت تسابق شتات ومقاطير
وقدمت لك يالمقابيل تذكار=يكتب ويقرا بجمله وتسطير
اما من الوسم زخات وامطار=ولا اجدبت واغترفنا من البير
نستنزف اعمارنا دون معيار=ونعايش الوضع من دون تدبير
يامضرم النار من صالي النار=ضاع الدوا والحنايا مجامير
لاعنك طاري ولانسمع اخبار=ولا منك فكّه ولا فيك تأثير
امشي دروب الهوايل والاخطار=طلعه ونزله ولفّه وتدوير
امس انتهينا ووقّعت الاقرار=واليوم كنسلت كل التقارير
واخرجتني من وسيعات الاقطار=ورميتني في خشوم المعابير
وحديتني يم قصّاف الاعمار=وانشبتني في طوال المشاوير
واهديتني من هداياك تذكار=كيّه وكيّه ومن دون تخدير
واصبحت كنّي على رقصة الزار=والقلب خفّاق كنّه على الزير
الوقت يعصف بنا عصف الاعصار=والعمر مقفي وفي حزّة عصير
والحلم ريشه على طايرطار=والعقل من زود الاحلام بيطير