يالله يامنشي السحاب المزابير = إنك تعدينا سبايب خطرها
اون في كبدي سوات المسامير = على شيوخ روحوا في خبرها
كانوا يدن وحده على الشر والخير = ومجالسن للي يجيها شكرها
العود يدرج والمصافي مناحير = ومفطحاتٍ سمنها من ظهرها
حريمهم مانقشن بالمناكير = ماحطت الحمره وقصت شعرها
اليا أخذت القربه تبى الماء من البئر = محلى القلاده ترتعش في نحرها
من يوم راحو والليالي مدابير = ماعاد نعرف شمسنا من قمرها
البارحه كثرت علي التفاكير = صبت عيوني فوق خدي مطرها
صفت همومي عند وجهي طوابير = والناس تسبح في شواطئ بحرها
أحدن سند وأحدن يحب المحادير = وأحدن يبا جبر العظام وكسرها
فروا علينا الناس مثل العصافير = والله يشقر من عصانا شقرها
اصحابنا صاروا سوات المناشير = تموت حر وكيدها في نحرها
صرنا هدف للي يدق المزامير = والناس عور ولاتبين عورها
لاوالله الي عكر الجو تعكير = واشوف بعض الناس محدن ذكرها
لبسيس ابو فواز حشمه وتقدير = الرجل عن بعض الجماعه قصرها
اهو ذرانا عن هبوب المعاصير = من دوننا ياكم خساره خسرها
نفسه عزيزه ومايحب المساير = وله ميزتن عينه بعيدٍ نظرها
لو طاعني قلبي تصدقت ببعير = لحرق بنات الشيخ وادفع مهرها
على النبي صلوا صلاه وتكبير = عداد ماشاف القمر من بشرها