قافي على وضح النقا دون تجريح=وان كان لكبود المعادين كاوي
للند عوق وللشكاله طحاطيح=والمجد كايد مايجي بالمناوي
عين النداوي لو تشوف الملاويح=لا احد يعوقه من يردّ النداوي
يبسط جناحينه على هبّة الريح=واللي نوى يثنيه ماهو بقاوي
وش حال حرّ تهتويه المساريح=يرقا سما لمعانق النو هاوي
دليل دربه مايبي زود توضيح=وان طالت الطرقه فلا هو بغاوي
يرقا على متن الغيوم المراويح=مدهاله الخط السريع السماوي
ان شاف جول مايبي زود تلميح=حوّل على جوله من الجو هاوي
اول مضاريبه تعوق المجاريح=واتلى مضاريبه سوات المطاوي
وان كانت الظلما بليا مصابيح=يهناه مرقاب المعزّه خلاوي
كنّه تعلّم مع هل الطب تشريح=تالي ضماه من احمر الدم راوي
شروى القروم الغانمين الزحازيح=والصبر تاليه انفراج الرجاوي
اشبوحنا عليا لو انقوم ونطيح=وان زاد جور الوقت خيره رهاوي
بعض المبادي للمعالي مفاتيح=النبت طيّب واخضر الغصن راوي
والجانب المظلم عزاته مناويح=والحال ثاوي لا غدا البال خاوي
ان ماوقف لمصادم الوقت زحزيح=ضاعت على الطيّب كبار الهقاوي
دلّه على جمر الغضى لازم تفيح=وتقنّد الروس العموسه قهاوي
وش خانت الدنيا بليا تسابيح=مات الفقير ومات حتى الغناوي
واصبح صباح الخير وطيوره تصيح=على الغصون تجر صوت الغناوي