ياشين وجه العسكري يوم عشره=وياحلو وجهه يوم خمسه وعشرين
من دون طوعه تقفل بلوف صدره=ولايشتغل في داخله كود بلفين
يادوب ياخذ له شهيقه وزفره=وخطرٍ عليه إنه تموت الشرايين
وتلمح بعينه من قسا الوقت عبره=وتشوف للحاجه بوجهه عناوين
وان قلت له خمسه وعشرين بكره=يفــز كنه وارثٍ لــه ملايين
ويجلس طوال الليل يرقب لفجره=ويحرم عليه النوم مايدخل العين
والشمس تعني لشرقت يوم فخره=وتروح كل الارض عنده بساتين
وياخذ نهار وليل في جو سكره=وياخذ نهار وليل مثل السلاطين
ويصبح وهو مثله مثل يوم عشره=ويقول ليت اليوم خمسه وعشرين
وهذي حياة العسكري طول عمره=مكتوب يفرح بالشهر بس ( يومين )