لحون العود

السلام عليكم ورحمة الله وبركاته
الله يمسيكم بالخير قصيده كتبتها بعد ان طلبت منا لجنة شاعر النخبه في منتديات ال عاطف انا واخواني الشعرا مجاراة اي قصيده للشاعر الكبير سلطان الهاجري وتشرفت بمجاراته والقصيده بين ايديكم واتمنا ان تنال اعجاب كل من شرفني بقراتها,,,,,,,,,

يالحون العود ولا يامجارير الربابه=شطر يسواله قصيده من حسن سبكه وفنه
من بنات افكار شاعر تحسب الساحه حسابه=شاعر(ن)لاغاب يفقد وان حضر تشعفه جنه
ذكر القلب الشقاوي سلة السيف ونصابه=في حما سود(ن) سهمها حدره رماح(ن)مطنه
دعج ووساع(ن)تشق الجوف وتسيل شعابه=سيلها دم الخفوق اللى لواحظها رمنه
وخدت(ن) بالليل الاظلم نورها الساري سرابه=لابطت الشيله عليها جاء لريح الزهر بنه
وجمرة(ن)لاشر وقام يعضها بسنه ونابه=قلت في نفسي عساك السوس يانابه وسنه
واحد(ن) من عام الاول نوخ وعقل ركابه=جاذبه نجر الغرام وكنه بصدري يدنه
نظرة لي راس مال وهرجته ربح وكسابه=وبسمته تبري وتمحا كل جرح وكل ونه
كل مابيني وبينه وقف البين وغرابه=وعني هروج العواذل عقب قربه بعدنه
جاني الموت وعرفت ان الهوي ماينغزابه=واعذابي من زعله ومن جهله وصغر سنه
كن روحي يوم فارق فارقت وامست ببابه=وكن لعيوني عزيز(ن) تو مامات وبكنه
وكن قلبي صيدة(ن) قامت تعشاه الذيابه=الهجوس الضاريه بانيابهن يمزعنه
لارضا عم الرضا دنياي وارواني عتابه=ولازعل خلاني اقرع من جفاه اقراع شنه
ولابقا في ذمتي له غير بيت من الكتابه=بكتبه والحبر من دم العروق اللى هونه
والله اني اعشقه واغليه واحبه واهابه=واستحي منه وعليه اخاف خوف امه واحنه
كان ماتكفيه مني يامجارير الربابه=علميه اني ابيه ومت فيه ومت منه

فهد بن رزيق
صح لسانك وعلا شانك
وليس غريب عليك الابداع والتألق
تقبل مروري
دمت بخير ,,,

كبير يا ابن رزيق وما تجاري إلا كبار الشعراء
شاعر متمكن وجزل وتستاهل كل خير وإشادة
صح لسانك ملايين يا الذيب
ونتمنى منك المزيد

الله الله الله
الصراحه يخونني التعبير ان اعبر
نص عانق السماء بروعته
شامخ كشموخ صاحبه الله يعطيك
الف الف الف عافيه يابن رزيق
وصح لسانك مليون ولا يسدون

صح لسانك مدد بلا عدد يا إبن رزيق
شاعر وجزل وماتكتب إلا الجزل
ليس غريب عليك التميز يافهد
هذي عوايدك يالذيب
صح لسانك مرة ثانية وثالثة
والله يعطيك الصحة والعافية

اخوي واعي صح بدنك والابداع في مرورك والله يبيض وجهك ياغالي
تقبل تحياتي’’’’’’’’’

صح بدنك يابوعبدالله وبيض الله وجهك على المرور والكلام الطيب ياطيب
تقبل تحياتي,,,,,

صح بدنك اخوي محيسن والله يعافيك والابداع انت راعيه والله يبيض وجهك ياذيبان
تقبل تحياتي,,,,

صح لسانك يابن رزيق
قصية في غاية الروعه والتميز

شكــرآ

صح بدنك اخوي شدادي كول والابداع انا اشهد انك من اهله والله يبيض وجهك على المرور والكلام الطيب ياطيب
تقبل تحياتي,,,,,,,